Հայք կենտրոնի հերթական ասուլիսը նվիրված էր Գյումրիի ողբերգական դեպքին. հյուրերն էին` հրապարակախոս Սեդա Վերմիշևան, Դեմկուսի նախագահ Արամ Սարգսյանը, “Ժառանգության” փոխնախագահ Արմեն Մարտիրոսյանը:

Ստորև ներկայացնում ենք էլեկտրոնային լրատվամիջոցների արձագանքը.

Գյումրու հանցագործության մեջ էթնիկ պատկանելություն չպետք է տեսնել. Քննարկում

Գյումրիում տեղի ունեցած ողբերգությունը քաղաքական չէ, և մենք չպետք է այն քաղաքականացնենք: Այս մասին հրավիրված քննարկման ժամանակ ասաց ռուս մտավորական, հրապարակախոս Սեդա Վերմիշևան: Նա գտնում է, որ հանցագործը հոգեկան հիվանդ է և այստեղ էթնիկ պատկանելություն չպետք է տեսնել, քանի որ այդ մարդը կարող էր լինել, այլ ազգի ներկայացուցիչ: Ի դեպ, նա նկատեց, որ Պերմյակովի ավագ եղբայրն էլ սպանել է կնոջը: Նա կարծում է, որ պետք չէ նույնացնել ռուս ժողովրդին իշխանության հետ:

Tert.am-ի հարցին, թե եթե ընդունենք դա, ապա այդ դեպքում ինչ գործ է ունեցել հոգեկան հիվանդը ռազմաբազայում, նա հղում կատարեց ռուսական կայքերին, որտեղ ՌԴ ղեկավարության առաջ բարձրաձայնվում է հենց այդ հարցը, թե ինչ գործ ունեն այդպիսի մարդիկ ծառայության մեջ:

Հայաստանի դեմոկրատական կուսակցության նախագահ Արամ Սարգսյանը ճիշտ հակառակը՝ կարծում է, որ այդ անձը հոգեկան հիվանդ չէ, քանի որ շատ հստակ ծրագիր է իրականացրել: «Համապատասխան գաղտնի ծառայությունները հոգեբանական մշակում են անցկացրել նրա հետ, սակայն չգիտեմ, թե որ ծառայությունները»,- ասաց նա և այստեղ մեր իրավապահ մարմինների թերացումը տեսավ:

«Ժառանգություն» կուսակցության փոխնախագահ Արմեն Մարտիրոսյանը նշեց, որ ցանկացած պարագայում պետք է հիշենք, որ Ռուսաստանի սահմանապահները գործում են Հայաստանի իրավասության տակ: Նա կարծում է, որ եթե ոչ հանցագործությունը, ապա հաջորդող իրադարձությունները քաղաքական բնույթ են կրում:

Արմեն Մարտիրոսյանը ամենաարժանահավատ վարկածն այն համարեց, որ հենց երեկոյան հանցագործը բռնված է եղել հայ իրավապահների կողմից և ինչ-որ եղանակներ են մտածել այն ռուսական կողմին հանձնելու համար:

Ըստ նրա՝ մեր իշխանությունների դրդմամբ հանրային դժգոհության ալիքը հյուպատոսություն ուղղորդվեց, ինչն անընդունելի էր, քանի որ ամեն դեպքում այն դիվանագիտական մարմին է: «Մեր իշխանությունների նկատմամբ պետք է պահանջը լինի: Եթե ռուս իրավապահները քննեն այդ ամբողջ գործընթացը, ապա ինձ և հասարակության մոտ ամեն տեսակ կասկած լինելու է, որոնք որևէ ձևով չեն փարատվելու»,- ասաց նա:

Tert.am

Վերմիշևա. «Գյումրու ողբերգությունը որպես քաղաքական երևույթ դիտարկելը հանցագործություն է»

Հայտնի հրապարակախոս և գրող Սեդա Վերմիշևան հանցագործություն է համարում Գյումրու ողբերգությունը որպես քաղաքական երևույթ դիտարկելու փորձերը։
Հունվարի 12–ին Գյումրիում, որտեղ տեղակայված է ռուսական 102–րդ ռազմակայանը, վեց հոգանոց ընտանիք է սպանվել։ Միակ ողջ մնացածը վեց ամսական Սերյոժա Ավետիսյանն է, ով հիմա վերակենդանացման բաժանմունքում է։ Հանցագործության կատարման մեջ կասկածվում է ռուս ժամկետային զինծառայող Վալերի Պերմյակովը, նա ձերբակալվել է երեքշաբթի և արդեն ընդունել է իր մեղքը։
«Մենք գործ ունենք քրեական հանցագործության հետ։ Եվ հանցագործություն է այս միջադեպը որպես քաղաքական երևույթ դիտարկելը։ Այս դեպքում մենք աշխատում ենք մեր ընդդիմախոսների, հակառակորդների օգտին, ովքեր ցանկանում են կառավարել հայ ժողովրդի գիտակցությունը», – ասաց Վերմիշևան շաբաթ օրը կայացած ասուլիսի ժամանակ։
Նա նշեց, որ հանցագործի ազգությունը նշանակություն չունի` ավելացնելով, որ այսօր էթնիկ և կրոնական երկպառակտությունը հասարակական գիտակցությունը մանիպուլյացիայի ենթարկելու և ժողովուրդներին միմյանց դեմ հրահրելու գլխավոր գործիքներն են` ի ցույց դնելով «կիսիր և իշխիր» դարավոր արտահայտությունը։
«Համախմբված հասարակությունը դժվար է կառավարել, ատոմացված հասարակությունը հեշտ է կառավարել։ Ցանկացած ժողովրդի ամենախոցելի տեղը էթնիկ ինքնասիրությունն է։ Այն, ինչ տեղի ունեցավ Գյումրիում, մենք պետք է դիտարկենք որպես քրեական հանցագործություն, որը կատարվել է որոշակի պետությանը, այս դեպքում Ռուսաստանին պատկանող որոշակի անձի կողմից, և Ռուսաստանի ու Հայաստանի օրենքներին համաձայն` նման քրեական հանցագործությունը պետք է քննվի համատեղ, քանի որ այն կատարվել է Հայաստանի տարածքում մյուս երկրի քաղաքացու կողմից։ Մենք այսպես պետք է նայենք այս ամենին», – ասաց Վերմիշևան։
«Ոճրագործությունը կատարվել է հոգեբանորեն անմեղսունակ մարդու կողմից։ Հայտնի է, որ նրա եղբայրը սպանել է սեփական կնոջը», – ավելացրեց Վերմիշևան։
ՀՀ դեմկուսի առաջնորդ Արամ Սարգսյանն իր հերթին նշեց, որ ռուսական օրենսդրության համաձայն` այն անձը, որի ընտանիքում հանցագործ կա, արտերկրում ծառայելու իրավունք չունի։
«Այս իրավիճակում հարցերը շատ են։ Մասնավորապես, ինչու՞ Հայաստանի ոստիկանությունը, իմանալով, որ Պերմյակովն ինքնակամ հեռացել է բազայից առավոտյան ժամը 4–ին, արդյունավետ միջոցներ չի ձեռնարկել նրան ձերբակալելու համար», – ասաց Սարգսյանը։
Պերմյակովի գործողությունները, Սարգսյանի կարծիքով, ցույց են տալիս, որ նա ոչ թե հոգեբանական շեղում ունի, այլ որ նա հստակ ծրագիր է կատարել։ «Լինելով աղանդավոր` նա ենթարկվել է լուրջ հոգեբանական մշակման, ընդ որում բացառված չէ, որ դա կատարվել է գաղտնի հատուկ ծառայությունների կողմից», – ասաց Սարգսյանը` ընդգծելով, որ հանցագործին Հայաստանում դատապարտելու պահանջներն արդար են։

Նովոստի–Արմենիա

Արամ Սարգսյան. Պերմյակովը պետք է դատապարտվի Հայաստանի տարածքում

Վալերի Պերմյակովը անպայմանորեն պետք է դատապարտվի Հայաստանի տարածքում եւ Հայաստանի օրենքներով: Այդ մասին այսօր՝ հունվարի 17-ին, մամուլի ասուլիսի ժամանակ հայտարարել է Դոմոկրատական կուսակցության նախարագահ Արամ Սարգսյանը:
Նրա խոսքով՝ ըստ Ռուսաստանի օրենքի՝ այն մարդը, ում ընտանիքում հանցագործ կա, ոչ մի դեպքում չպետք է ծառայի արտերկրում, եւ այդ կապակցությամբ հետաքննություն պետք է անցկացվի: «Պերմյակովը հոգեկան հիվանդ չէ: Ես հավատում եմ վարկածին, որ նա իրականացրել է հստակ ծրագիր: Կարծում եմ, որ նա աղանդավոր է. նա աղադավորական ընտանիքից է եւ այդ ողջ ընթացքում ինտերնետով կապ է պահանել այդ աղանդի հետ», – ասել է Արամ Սարգսյանը:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դուստրը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց: Նրա վիճակը կայուն ծանր է: Հանցագործության հիմնական մեղադրյալը ռուս զինծառայող Վալերի Պերմյակովն է: Նրա գտել են հայ-թուրքական սահմանի մոտ: Որոշվել է, որ Պերմյակովի գործը կքննի ռուսական կողմը:
NEWS.am

Պերմյակովն իրագործել է հստակ պլան, իսկ ՀՀ իրավապահներն էֆեկտիվ գործողություններ չեն ձեռնարկել. քաղաքական կարծիքներ

«Մենք գործ ունենք քրեական հանցագործության հետ, այստեղ քաղաքական ոչ մի բան չկա: Էթնիկ պատկանելիության վրա ևս չպետք է շեշտադրում անել, քանի որ այդ մարդը կարող էր լինել այլ ազգի ներկայացուցիչ»,-այսօր Գյումրիի դեպքերի հետ կապված քննարկմանն ասաց ռուս մտավորական, հրապարակախոս Սեդա Վերմիշևան՝ առաջ քաշելով վարկած, որ հանցագործը հոգեկան հիվանդ է, որ Պերմյակովի ավագ եղբայրն էլ սպանել է սեփական կնոջը:
Հակադարձմանը՝ եթե ընդունենք, որ դա այդպես է, այդ դեպքում ինչ գործ ունի հոգեկան հիվանդը ռազմաբազայում, հրապարակախոսը նշեց՝ ՌԴ ղեկավարության առաջ այս հարցը բարձրացվում է՝ ակնարկելով, թե թվաքանակ լրացնելու համար օլիգարխի երեխաների փոխարեն նմաններին են ուղարկում ծառայության: Ըստ նրա՝ խիստ ընտրություն պետք է լինի, հատկապես, երբ զորակոչիկը Ռուսաստանի սահմաններից դուրս է ծառայությունն անցնելու:
Հանդիպմանը ներկա Հայաստանի դեմոկրատական կուսակցության նախագահ Արամ Սարգսյանը չհամաձայնեց Վերմիշևայի այն վարկածի հետ, թե Գյումրիի սպանդի մեջ մեղադրվող Պերմյակովը հոգեկան հիվանդ է. «Այն, որ նա սպանությունից հետո բարձրացել է տանիք, հետո իջել, փոխել շորերը կամ այդ ընտանիքի բոլոր անդամները մեկ սենյակում չեն եղել, նրանց փնտրել է, խոսում է այն մասին, որ հստակ ծրագիր է իրականացրել: Հետո՝ պահակակետ ուղարկում են այն անձանց, ովքեր ունեն հոգեկան հավասարակշռություն: Նա աղադավորական ընտանիքից է և այդ ողջ ընթացքում ինտերնետով կապ է պահանել այդ աղանդի հետ, ավելին՝ համապատասխան գաղտնի ծառայությունները հոգեբանական մշակում են անցկացրել նրա հետ»:
Շարունակելով միտքը, Արամ Սարգսյանը տեղեկացրեց, որ Ռուսաստանի օրենքի համաձայն՝ այն մարդը, ում ընտանիքում հանցագործ կա, ոչ մի դեպքում չպետք է ծառայի արտերկրում, և այդ առիթով հետաքննություն պետք է անցկացվի:
ՀԴԿ առաջնորդի դիտարկմամբ լուրջ թերացում, եթե չասենք՝ անգործություն են թույլ տվել ՀՀ իրավապահ մարմինները. ժամը չորսին տեղեկացվել է, որ նա փախել է բազայից, երկու ժամ հանցագործը ման է եկել և այդ երկու ժամվա ընթացքում ՀՀ իրավապահ մարմինները որևէ էֆեկտիվ գործողություն չեն կատարել: Արամ Սարգսյանը ևս այն կարծիքին է, որ Վալերի Պերմյակովը անպայմանորեն պետք է դատապարտվի Հայաստանի տարածքում և Հայաստանի օրենքներով:
«Ժառանգություն» կուսակցության փոխնախագահ Արմեն Մարտիրոսյանը համաձայնեց ասվածի հետ՝ ընդգծելով, որ խախտվել է միջպետական պայմանագիր, որում կան բացառություններ, որոնց մեջ այս դեպքը չի մտնում, այսինքն՝ եթե ռազմաբազան ամբողջությամբ ՌԴ-ին է ենթարկվում, ապա ռուս սահմանապահները գործում են Հայաստանի իրավասության տակ և նրանք պարտավոր էին Պերմյակովին հանձնել ՀՀ իրավապահներին: Այստեղ Մարտիրոսյանը արժանահավատ համարեց այն վարկածը, որ հենց երեկոյան հանցագործը բռնված է եղել հայ իրավապահների կողմից և ինչ-որ եղանակներ են մտածել նրան ռուսական կողմին հանձնելու համար.«Մինչև ժամը 6-ը ոստիկանությունը Երևանում որոնողական գործողություններ էր կատարում, դրանից հետո մարզպետն ասաց, որ անհանգստանալու առիթ չկա, և իրավապահ ուժերը մարզային համապատասխան կառույցի մոտ կենտրոնացվեցին»:
Ինչ վերաբերում է Գյումրիի դեպքին հաջորդած զարգացումներին, Մարտիրոսյանն ակնարկեց, որ իշխանություններն իրենց վրայից ուշադրությունը շեղելու համար հանրային դժգոհության ալիքը ՌԴ հյուպատոսություն ուղղորդեցին, ինչն անընդունելի էր, քանի որ ամեն դեպքում այն դիվանագիտական մարմին է:
Ըստ նրա ՝ պահանջը պետք է լինի ՀՀ իշխանություններից առ այն, որ Պերմյակովը հանձնվի հայ իրավապահներին. «Մեր ուշադրությունը պետք է կենտրոնանա մեր իշխանությունների վրա: Մենք նույնիսկ ցավակցական խոսք չենք լսել ՀՀ նախագահից»:
«Ժառանգություն» կուսակցության փոխնախագահը նշեց, որ ՀՀ-ն և ՌԴ-ն պետք է վերաշարադրեն ռազմական պայմանագրի դրույթները, որ կասկածելի անձինք ՀՀ չգան ծառայելու, երկրորդ՝ պետք է տեխնիկապես բազան այնպես հագեցված լինի, որպեսզի անցակետով լինի կապն արտաքին աշխարհի հետ:
Արամ Սարգսյանը ևս գտնում է, որ ՌԴ-ին հստակ պահանջներ պետք է ներկայացվեն՝ թե բուն գործի շրջանակում, և թե կապված բազայի գործունեության հետ:
Մասնավորապես, անհրաժեշտ է պարզաբանել՝ ով է Պերմյակովը, ինչպիսին է կարգապահությունը բազայում, պետք է փաստաթուղթ ձևավորվի այդ հարցով, երկրորդ՝
պետք է քննարկվի հարաբերությունները տեղական իշխանությունների հետ, որոնք պետք է վերահսկողություն ունենան բազայի գործունեության առումով՝ չխառնվելով ներքին հարցերին:
Դիտարկմանը, թե ՌԴ իշխանությունները ևս իրենց ընդառաջ չգնալու գոռոզ պահվածքով լարվածություն են ստեղծում հայ հասարակության շրջանում, արդեն ռուս հրապարակախոս Սեդա Վերմիշևան նկատեց, որ ՌԴ կառավարությունից ռուս հասարակությունն էլ է դժգոհում՝ հորդորելով ռուս ազգին չնույնացնել իշխանությունների հետ. «Ինչպես հայերն են դիմում իրենց իշխանություններին, այնպես էլ ռուսներն են դիմում, նամակներ հղում: Ընդհանուր համակարգում մեկ տարրը չի կարող չհամապատասխանել ամբողջ համակարգին: Կամ պետք է համապատասխանի, կամ կվերանա»:

times.am

«Պերմյակովը շատ հստակ կատարել է ծրագիր»

Էլյա ՀՈՎՀԱՆՆԻՍՅԱՆ

«Մենք գործ ունենք քրեական հանցագործության հետ եւ դրա հետեւում ոչ մի քաղաքական բան չկա»,-այսօր «Հայք» վերլուծական կենտրոնում խոսելով Գյումրիում տեղակայված 102-րդ ռազմաբազայի ռուս զինծառայող Վալերի Պերմյակովի կողմից 6 հոգանոց Ավետիսյանների ընտանիքի սպանության դեպքից, նման կարծիք հայտնեց ռուս մտավորական, հրապարակախոս Սեդա Վերմիշևան: «Եթե մենք այս դեպքը որպես քաղաքական երեւույթ դիտարկենք, ապա դա կլինի համար առաջին հանցագործությունը»,-նշեց բանախոսը: Տիկին Վերմիշեւայի խոսքով՝ տեղի է ունեցել միայն քրեական հանցագործություն, որի պարագայում ազգությունը եւ էթնիկ պատկանելությունը ոչ մի կապ չունեն. «Մենք պետք է մի բան հասկանանք, որ հիմա էթնիկ պատկանելության միջոցով շատ հեշտությամբ կարելի է մանիպուլյացիայի ենթարկել հանրության գիտակցությունը»:

Տիկին Վերմիշեւայի խոսքով՝ նման հանցագործությունը պետք է քննության ենթարկվի համատեղ, քանի որ այն տեղի է ունեցել Հայաստանի տարածքում, միեւնույն ժամանակ այլ ազգի անձնավորության կողմից: «Նման վայրենի հանցագործությունը կարող էր կատարել միայն հոգեպես անառողջ մարդը: Առողջ անձնավորությունը երբեք նման հանցանք չէր կատարի»,- այս տեսակետը հայտնեց մտավորականը:

Ասուլիսին Դեմոկրատական Կուսակցության նախագահ Արամ Սարգսյանը իր խոսքում մեջբերեց ռուսական օրենսդրությունից մի հատված, որտեղ հստակ ասվում է, որ այն անձը, որի ընտանիքում կա հանցագործություն կատարած անձ, երկրի սահմաններից դուրս չպետք է ծառայի: Իսկ Պերմյակովի ընտանիքում եղբայրը սպանել էր իր կնոջը: Պրն Սարգսյանը հակված է հետեւյալ վարկածին. «Նա ժամը չորսին ինքնակամ պահակակետից հեռանում է, երկու ժամ զվռնում է քաղաքում, իսկ մեր իրավապահները արդեն դրա մասին տեղեկություն ստացած լինում են, սակայն այդ երկու ժամվա ընթացքում ոչ մի արդյունավետ գործողություն չեն կատարում: Նա մտնում է տուն, չգիտես ոնց, եւ սառնասրտորեն 6 հոգու, որոնք հավանաբար տարբեր սենյակներում են, սպանում է: Այստեղ չի կարելի ասել, որ նա ուղեղն անջատած այդ քայլերն արել է: Նա շատ հստակ կատարել է ծրագիր: Նա հանգիստ շորը փոխել է, բարձրացել է տանիք, զենքը պահել, դուրս է եկել: Այստեղ հոգեկանի հետ կապված բան չկա:

Նա աղանդավորների ընտանիքից է եւ ինտերնետով այս ողջ ընթացքում կապ է ունեցել այդ աղանդի հետ: Ես չեմ բացառում, որ համապատասխան գաղտնի ծառայությունները լուրջ հոգեբանական մշակում են իրականացրել այդ անձի հետ»: Պրն Սարգսյանը վստահ է, որ Պերմյակովին պետք է Հայաստանի օրենքների համաձայն դատել: «Ժառանգության» փոխնախագահ Արմեն Մարտիրոսյանն էլ հիշեցրեց, որ ռուս սահմանապահները գործում են Հայաստանի իրավասության տակ. «Օրինակ եթե նրանք բռնում են որեւէ օրինախախտի, ապա կապ չունի ազգությունը, նրան հանձնում են հայ իրավապահներին»: Պրն Մարտիրոսյանը նաեւ նշեց, որ Հայաստանի եւ Ռուսաստանի միջեւ գոյություն ունի ռազմաբազայի վերաբերյալ պայմանագիր, որում, բացառությամբ 3 կետերի, մնացած բոլոր կետերի համաձայն հայկական կողմը պետք է քննի հանցագործությունը: Իսկ այս դեպքը չի մտնում այդ բացառությունների մեջ: Արմեն Մարտիրոսյանը համաձայնեց այն մտքի հետ, որ հանցագործությունը քրեական է եղել, սակայն, ըստ նրա, այն իրադարձությունները, որոնք հաջորդեցին այդ դեպքին, արդեն քաղաքական ենթատեքստ ունեն:

«Միանշանակ անընդունելի էր մեր իշխանությունների պահվածքը: Մինչեւ հիմա գործող նախագահի պաշտոնը զբաղեցնող անձի խոսքը չենք լսել, գոնե ցավակցական խոսքը չենք լսել»,- նկատեց պրն Մարտիրոսյանը: Պրն Մարտիրոսյանի խոսքով անհասկանալի էր այն, որ իշխանությունների դրդմամբ, ուշադրությունը իրենց վրայից շեղելու համար, իրենք հանրային դժգոհության ալիքը ուղղորդեցին դեպի ռուսական հյուպատոսություն. «Դա թույլատրել չէր կարելի: Պահանջը պետք է լիներ բացառապես մեր իշխանությունների նկատմամբ»: Պրն Մարտիրոսյանը մտավախություն ունի, որ եթե Պերմյակովի գործը քննվի ռուսական դատարանում, ապա կասկածները չեն դադարելու իր մոտ եւ որեւէ կերպ չեն փարատվելու:

Aravot.am

Այն վարկածը, թե Վալերի Պերմյակովը կարող է հոգեկան խնդիրներ ունենալ, բացառվում է

Այս մասին այսօր Հայք կենտրոնում հրավիրված մամուլի ասուլիսի ժամանակ լրագրողների հետ զրույցի ընթացքում նման կարծիք արտահայտեց Դեմկուսի նախագահ Արամ Սարգսյանը:

«Ըստ Ռուսաստանի օրենքի, այն անձը, որի ընտանիքում եղել է հանցագործ, իսկ մեզ բոլորիս հայտնի է, որ Պերմյակովի եղբայրը հանցագործ է, չի կարող ուղարկվել արտասահման: Սա խոսում է այն մասին, որ նա հոգեկան հիվանդ չէ և իր կատարծ գործողությունները շատ մեծ հարցականներ են դնում», – ասաց Արամ Սարգսյանը:

Արամ Սարգսյանը կարծում է, որ սա սեկտանտ է, և այդ ընթացքում հանցագործը կապ է պահել սեկտայի հետ` չբացառելով նաև այն, որ Պերմյակովի հետ համապատասխան գաղտնի ծառայությունները հոգեբանական մշակում են անցկացրել:

Գյումրիում տեղի ունեցած դեպքի վերաբերյալ խոսելիս Արմեն Մարտիրոսյանը նկատում է.
«Հանցագործությունը քրեական է, բայց այն իրադարձությունները, որ հաջորդեցին դրան, ունեն քաղաքական բնույթ»:
Արմեն Մարտիրոսյանը հիշեցնում է, որ ռուս սահմանապահները գտնվում է են Հայաստանի իրավասության տակ, և նրանց կատարած գործողությունները պետք է քննվեն Հայաստանի կողմից:

Նրա խոսքով` գոյություն ունի պազայի պայմանագիր Հայաստանի և Ռուսաստանի միջև: Եվ եթե անգամ ռուսական օրենքով ռուս զինվորին պետք է դատապարտեն ռուս իրավապահները, միևնույն է` այս դեպքում աշխատում է ռուս-հայկական պայմանագիրը:

Արմեն Մարտիրոսյանի կարծիքով` գործը պետք է Հայաստանի իրավասության տակ լինի:
slaq.am