Հարցազրույց ԼՂՀ նախագահի մամուլի խոսնակ ԴԱՎԻԹ ԲԱԲԱՅԱՆԻ հետ

-Օրերս Արցախում էր Հայաստանի խորհրդարանական պատվիրակությունը՝ ԼՂՀ իշխանությունների հետ Բերձորում կատարվածը քննարկելու նպատակով: Որքանո՞վ էր այցը արդյունավետ, ու եթե նկատի ունենանք, որ խմբում ներառված էին իշխանական և ընդդիմադիր պատգամավորներ, ապա Արցախի իշխանությունների դիտարկումները նրանց կողմից նո՞ւյն կերպ ընկալվեցին:

-Մենք ողջունում ենք ՀՀ խորհրդարանական ուժերի ներկայացուցիչների այցը Արցախ: Նման հանդիպումները, այցերը շատ կարևոր են հայկական երկու պետությունների միջև կապերի ամրապնդման, խորացման համար, հատկապես, այնպիսի իրավիճակներում, երբ առավել քան հարկավոր է համատեղ որոշումների կայացումը: Քննարկվել են մի շարք հարցեր. առանձնահատուկ ուշադրություն է դարձվել սահմաններում տիրող իրավիճակի վրա, ինչն ամենակարևոր խնդիրն է, խոսվել է բանակաշինության մասին, նաև ԼՂ հակամարտության գործընթացից, և իհարկե, հունվարի 31-ին Բերձորում կատարվածի մասին: Այցը գնահատում եմ արդյունավետ: Չկա գեթ մեկ ողջամիտ մարդ, լինի իշխանավոր, թե ընդդիմադիր, որ Հիմնադիր խորհրդարան կոչվածի կատարածը ողջունի: Բոլորը հավասարաչափ դատապարտում են կատարվածը: Այլ բան է, որ եղել են բախումներ ու պետք է այսօր դրանք լրջորեն հետաքննվեն, որ տեսնենք իրականում ի՞նչ է տեղի ունեցել: Իսկ հետաքննության իրականացման հարցում ԼՂՀ իշխանությունները վճռականորեն են տրամադրված:

-Հիմնադիր խորհրդարանի անդամները չեն դադարում պնդել, թե սադրանքը եղել է Արցախի ոստիկանության կողմից: Գուցե, ոստիկանները պետք է առավել զգո՞ն լինեին:

-Մի բան հստակ է, Հիմնադիր խորհրդարան կոչվածը ամեն ինչ արել է, որ լինի սադրանք: Սա եղել է նրանց հիմնական նպատակը: Այդ մարդկանց պետք էր, որ նման իրավիճակ ստեղծվեր, պետք էր, որ հարամեն Հայոց ցեղասպանության միջոցառումները, Ապրիլի 24-ը: Իսկ այդ նպատակների մասին բացեիբաց ասում են նրանց կարկառուն դեմքերը: Ի դեպ նրանցից մեկը՝ Իգոր Մուրադյանը հայտարարեց, թե վերադարձնում է ԼՂՀ շնորհած մեդալը , բայց իրականում նա մեդալը չի վերադարձրել, այլ միայն վկայականը, սա անհեթեթ պահվածք է, եթե մերժում է, ուրեմն, թող բարի լինի տղամարդավարի ամբողջը վերադարձնի, այլ ոչ թե կիսատ-պռատ քայլեր անի, սա հերթական մուտիլովկան է:

-Ձեր հարցազրուցներից մեկում ակնարկել եք՝ ՙտեսաձայնագրություններ չկան, որովհետև դա իրենց պետք չէ, իսկ իրենք ինչ ասես, որ չեն ասել՚: Ուզում եք ասել, որ երթի մասնակիցներն ե՞ն ոստիկաններին մղել սադրանքի, թերևս նրանց հասցեին վիրավորական խոսքեր ուղղելով, իսկ հետո մոնտաժել տեսաերիզները:

-Այո, ես կարծում եմ սադրիչներին հաջողվել է Արցախի ոստիկանությանը հունից հանել՝ վատ խոսքեր ասելով, հայհոյելով, անգամ թուրք անվանելով: Բայց շրջանառվող տեսանյութերում ոչ մի ձայն, ոչ մի խոսք չի լսվում, ու դա վկայում է այն մասին, որ նրանք ոչնչացրել են ձայնագրությունները: Մինչ իրավապահները կտան կատարվածի իրավական գնահատականը, նշեմ մի կարևոր հանգամանք: Արցախի ոստիկանները երբևէ նման իրավիճակի հետ չեն առնչվել, քանի որ Արցախում երբեք պառակտիչ, հակապետական ցույցեր չեն անցկացվել: Եվ դա փաստում է մեր ներքին բարձր կուլտուրայի, համախմբվածության մասին: Սա փաստում է նաև մեր ուժեղ ու ժողովրդավարական պետություն լինելու մասին, ուր նման խժդժություններ չեն լինում, քանի որ կա գիտակցումը՝ Արցախը գտնվում է պատերազմական իրավիճակում:

Մենք ունեցել ենք քաղաքականապես թեժ ընտրություններ՝ թե՜ նախագահական, թե՜ խորհրդարանական, սակայն երբեք նման զարգացումներ չեն եղել: Սա միտումնավոր ստեղծված իրավիճակ էր, ինչ-որ ուժերի ձեռքի գործը: Եվ ահա, Արցախի ոստիկանները բախվում են սադրիչների կողմից հրահրված՝ իրենց համար արտասովոր իրավիճակի հետ: Դա վկայում է Արցախի ոստիկանության անպատրաստ լինելու մասին, անգամ համապատասխան սարքավարումներ չեն ունեցել: Այսինքն, Արցախի կողմից որևէ բան ծրագրված չի եղել: Կարծում եմ, որ եկողները նախօրորք ուսումնասիրել էին ներքին իրավիճակը ու համոզվել, որ ոստիկանությունը, պետական համակարգը երբևէ շփված չլինելով նման ներքին խռովարար երևույթների հետ,նաև դրա դեմ պայքարելու փորձ չունեն:

-Մինչդեռ եկողները <զինված> էին ձայնագրիչներով, տեսախցիկներով, այսպես կոչված՝ <միջազգային լրագրողով>:

-Այո: Նրանց պատրաստված այցը հուշում է, որ եղել էին մշակված պրովակացիոն սցենարով: Ո՞ւմ են ուզում հասցնել այդ տեսաերիզները, մեր թշնամիների՞ն: Այս դեպքը ցույց տվեց, որ կան թափթփուկներ, որոնց մասին Արցախում չգիտեին: Մենք տեսանք՝ իրենց քաղաքական գործիչներ ու մեկնաբաններ համարող անդաստիարակ մարդկանց: Ես անգամ սարսափով եմ մտածում՝ ի՞նչ կարող է լինել, եթե հանկարծ նման թափթփուկները տիրապետեն իշխանական լծակների, դա մեր ազգի համար կլինի իսկական ողբերգություն: Ցավով պետք է ասեմ, որ հայերի անվան տակ կան ու գործում են ոչ էթնիկ հայեր, որոնք վատ ծառայություն են մատուցում մեր ազգին, ավելի վատ, քան մեր բացահայտ թշնամին: Մեր իմունային համակարգը պետք է ուժեղացնենք, որ կարողանանք նման վիրուսներից ազատվել, կարողանաք սադրանքներից ավելի ուժեղացած դուրս գալ:

-Ասվում է, թե Արցախի ոստիկանապետի խնդրանքին՝ չմտնել Արցախ, Ժիրայր Սեֆիլյանը նախ համաձայնել է, բայց հետո ասել, թե որոշումները միայնակ չի կայացնում: Սա չի՞ փաստում, որ նա ուղղորդվում է ինչ- որ ուժերի կողմից:

-Սեֆիլյանը նման բան ասել է և դա փաստ է: Ու նրա պատասխանը, այո, թույլ է տալիս ենթադրել, որ իր հետևում ինչ-ինչ ուժեր կան, որոնց հետ նա նման հարցերի շուրջ խորհրդակցում է: Իսկ թե ովքե՞ր են, ի՞նչ ուժ են և ի՞նչ նպատակներ են հետապնդում պետք է պարզեն համապատասխան մարմինները: Չնայած, անկեղծ ասած, ամեն ինչ այնքան պարզ է: Ի դեպ, եթե մինչ այդ դեպքը Արցախում կային մարդիկ, ովքեր հարգում էին Ժիրայր Սեֆիլյանին որպես կռված տղայի, ապա այսօր գերակշիռ մեծամասնությունը հիասթափված է նրանից:

-Տեր-Պետրոսյանի տարիներից շրջանառված ղարաբաղցի-հայաստանցի տարանջատող ցեցը Բերձորում կատարվածից հետո դարձյալ մեջտեղ է բերվում: Արցախում ի՞նչ տրամադրություններ են այս առումով:

– Արցախում ղարաբաղցի-հայաստանցի տարանջատում ընդունում են որպես կեղտոտ քարոզչություն: Բարեբախտաբար, մենք կարողացել ենք ձերբազատվել այդ ամենից, չի էլ եղել նման բան, որքան էլ որոշ ուժեր անընդհատ աշխատել ու այսօր էլ աշխատում են պառակտում սերմանել: Սա այլ բան չէ, քան հարված մեր պետականությանը: Թույլ չենք տա, որ նման պառակտումներ լինեն, ես հավատում եմ մեր ժողովրդին, նրա գիտակցությունն այնքան բարձր է, որ նման սադրանքների երբեք չի գնա:

–Հիմա էլ չեն դադարում խոսել այն մասին, թե Բերձորի դեպքն ազդել է Արցախի վարկի վրա, թե միջազգային կառույցները իրենց խոսքն ասելու են. տպավորությունն այնպիսին է՝ կարծես դրսին ուղղորդում են բացասական կարծիք հնչեցնել:

-Արցախը միշտ բարձր գնահատականի է արժանանում տարբեր միջազգային կառույցների կողմից: Բայց հիշում եմ, որոշ անհասկանալի ուժեր նման շահարկումներ արեցին 2012-ի ընտրությունների ժամանակ, արդյունքում ժոդովրդավարության աստիճանով մեր գնահատականը իջավ, չնայած հետո նորից բարձրացավ: Հիմա դարձյալ այդ կասկածելի ուժերը, որոնք հրահրեցին այս սադրանքը, պետք է աշխատեն, որպեսզի միջազգային կառույցները մի վատ հայտարարությամբ հանդես գան: Գիտեք, այս օրերին մի բան էի մտածում՝ ի՞նչ կլիներ, եթե Ադրբեջանում Սեֆիլյանի նման մեկը իր խմբով հայտնվեր ու փորձեր նման քայլ կատարել: Ադրբեջանի իշխանությունը, որը փակեց Ազատություն ռդ-ն, հետապնդում է իրավապաշտպաններին, ուղղակի կկորցներ այդ խմբին: Ու ես հպարտ եմ, որ մեր երկիրը այդպիսին չէ, որ մեր համակարգը ժողովրդավարական է: Ի վերջո, մենք պատերազմեցինք օտարի լծի դեմ, որպեսզի ժողովրդավարական պետություն կառուցենք: Ու հիմա, եթե ինչ-որ սադրիչներ փորձում են իրավիճակից օգտվել՝ զզվելի է: Ո՞ւմ ջրաղացին եք ջուր լցնում:

-Բերձորյան դեպքերի մասին Հիմնադիր խորհրդարանը հայտարարություն է տարածել, որում ինչ-որ մտքեր են շարադրված՝ ՙԱրցախը Հայաստանից տարանջատելու՚, ՙԻրանի հետ մեր սահմանին հայկական վերահսկողությունը վերացնելու՚ և այլնի մասին. սրանց հետևո՞ւմ ինչ նոր սադրանք է թաքնված:

-Այդ հայտարարությունը գրողը կա՜մ տգետ է, կա՜մ իրոք սադրում է: Ի՞նչ ասել է՝ վերացվում է հայկական վերահսկողությունը Իրանի հետ սահմանին: Այն վերահսկում են մեր զինվորները, այդպես եղել է ու կլինի միշտ: Իրանի սահմանին մենք դեռ անցակետ չունենք, ժամանակը կգա, դա էլ կլինի: Կամ՝ ի՞նչ ասել է Արցախ տարանջատվելու է Հայաստանից: Արցախը Հայաստան է ու միայն աննորմալ պրովակատորը կարող է հակառակը պնդել: Այս ամենը նաև հուշում է, որ մենք լուրջ գործ ունենք անելու նաև դաստիարակության առումով, քանի որ մարդիկ են գալիս ասպարեզ, որոնք զուրկ են բարոյական հատկանիշներից, անհանդուրժող են, լպիրշ, սա շատ վտանգավոր է մեր երկու պետությունների համար:

Մենք ներսից պետք է լինենք մաքուր ու հզոր, հակառակ դեպքում ներսից նեխումը կարող է խփել մեր պետականությանը՝ մեզ համար ամենաթանկ արժեքին:

ԱՐՄԻՆԵ ՍԻՄՈՆՅԱՆ