Մահափորձից փրկված 9-ամյա տղայի վիճակը շարունակում է մնալ ծանր 13:54 . 10/02/15 Նոր Նորքի բնակչուհի Աննա Բադալյանի 9-ամյա որդու առողջական վիճակը շարունակում է մնալ ծանր: Նա դեռեւս Սուրբ Գրիգոր Լուսավորիչ բժշկական կենտրոնի վերակենդանացման բաժանմունքում է: Փոքր, բայց դրական տեղաշարժ բժիշկները նկատում են:

Նա հիվանդանոց էր տեղափոխվել գանգուղեղային բաց վնասվածքով եւ մարմնի տարբեր մասերի այրվածքներով, վիրահատվել է: Երեկ Երեւանի Գյուլիքեւխյան փողոցի 23/1 շենքի թիվ 48 բնակարանում հրդեհ էր բռնկվել:

Հրշեջ-փրկարարները դեպքի վայրից ծխահարված, այրվածքներով եւ տարբեր աստիճանի մարմնական վնասվածքներով դուրս էին բերել նույն հասցեի բնակիչ, 1968 թվականին ծնված Աննա Բադալյանին եւ վերջինիս 9-ամյա որդուն:

Աննա Բադալյանը ստացել է ամբողջ մարմնի 4-րդ աստիճանի այրվածք: Հարուցվել է քրեական գործ՝ մոր կողմից երեխային սպանելու փորձ կատարելու եւ գույքը դիտավորությամբ ոչնչացնելու համար։ Ի դեպ, մոր վիճակը բժիշկները գնահատում են ծանր եւ անհույս։ Նա դեռ այրվածքային շոկից դուրս չի եկել։