Հալեպում ՀՀ գլխավոր հյուպատոս Տիգրան Գևորգյանն այցելել է Լաթաքիա և Քեսաբ
Հալեպում ՀՀ գլխավոր հյուպատոս Տիգրան Գևորգյանը փետրվարի 6-9-ը այցելել է Լաթաքիա և Քեսաբ:
Ինչպես հայտնում են ՀՀ արտգործնախարարությունից՝ փետրվարի 7-ին և 8-ին Տիգրան Գևորգյանը հանդիպումներ է ունեցել տեղի ազգային իշխանությունների ներկայացուցիչների հետ: Քննարկվել է Սիրիայի ծովափնյա շրջաններում բնակվող, հատկապես Հալեպից, Ռաքքայից և այլ քաղաքներից գաղթած հայության կացությանն առնչվող հարցերի լայն շրջանակ:
Փետրվարի 9-ին Քեսաբի Սուրբ Խաչ եկեղեցու սրահում գլխավոր հյուպատոսը քեսաբցիներին հանձնել է ՀՀ քաղաքացու անձնագրեր: Այնուհետև գլխավոր հյուպատոսը հանդիպել է Քեսաբի քաղաքային իշխանությունների ներկայացուցիչների հետ, որի ընթացքում քննարկվել են Քեսաբի վերականգնմանն առնչվող հարցերը, ինչպես նաև՝ քեսաբցիներին հուզող մի շարք այլ խնդիրներ և դրանց լուծման հեռանկարները:
Լաթաքիա այցելության երկու օրերի ընթացքում տեղի Հայոց Ազգային Առաջնորդարանում Հալեպում ՀՀ գլխավոր հյուպատոսության աշխատակիցների կողմից իրականացվել է հյուպատոսական ընդունելություն Սիրիայի հյուսիս-արևմտյան շրջաններում բնակվող հայերի համար:
Դիտել Լրահոս, Տարածաշրջան, Քաղաքականություն բաժնի բոլոր նյութերը
