Իտալիայի Սենատը կողմ է քվեարկել Հոլոքոստն ու այլ ցեղասպանությունների ժխտումը քրեականացնող օրինագծին։ Այս մասին գրում է Asbarez-ը՝ վկայակոչելով The Local գործակալությանը։

Օրինագծի ընդունման օգտին քվեարկել է 234 սենատոր, 8-ը ձեռնպահ են մնացել, եւս երեքը դեմ են քվեարկել։ Համաձայն նոր օրենքի՝ ցեղասպանության լրիվ կամ մասնակի ժխտման հիման վրա ռասայական խտրականության դրսեւորման, աջակցության եւ դրդման համար նախատեսված է երեք տարվա ազատազրկում։

Մարդկության դեմ հանցագործություններն ու ռազմական հանցագործությունները նույնպես ընդգրկված են օրինագծում, որը օրենքի վերածվելու համար պետք է հավանություն ստանա նաեւ Իտալիայի խորհրդարանի ստորին պալատի կողմից։