Երևանի Սուրբ Գրիգոր Լուսավորիչ Մայր եկեղեցու «Հավատամք» հոգևոր միության սոցիալական բաժնի երիտասարդները, միության հոգևոր հովիվ Տեր Հակոբ քահանա Խաչատրյանի առաջնորդությամբ Մեծ պահքի շրջանի առաջին օրը և քաղցկեղով հիվանդ երեխաների միջազգային հաջորդ օրը այցելեցին Երևանի Ռ. Յոլյանի անվան Արյունաբանական կենտրոն:

Նախ կատարվեց Տնօրհնեքի արարողություն, ավանդական և ամենահին կարգերից մեկը, նաև Բժշկության աղոթք՝ լեյկոզով հիվանդ երեխաների առողջացման համար, այնուհետև Պահպանիչ աղոթք՝ բժշկական անձակազմի և ներկաների համար:

-Այսօր Հայաստանում քաղցկեղով մոտ 900 հիվանդ երեխա կա, որոնց 20 տոկոսը՝ սուր լեյկոզով: Մեր կենտրոնում ամեն ինչ արվում է նրանց բուժման համար,- ասաց կենտրոնի բուժ գծով տեղակալ Նատաշա Մելքիկյանը:

Տեր Հակոբն իր խոսքում մաղթեց հիվանդ երեխաներին և ֆիզիկական, և հոգևոր ու մտավոր առողջություն, որից հետո «Հավատամք» հոգևոր միության աջակիցների կողմից փոխանցված նվերները՝ տարբեր խաղալիքներ, հանձնվեցին նրանց: