Լեռնային Ղարաբաղի տարածք ներթափանցած եւ անցած տարվա դեկտեմբերին կատարած սպանության, լրտեսության եւ մի շարք այլ մեղադրանքներով դատապարտված ադրբեջանցի դիվերսանտների քայլերը Միացյալ Նահանգների պետքարտուղարի օգնական Վիկտորիա Նուլանդը հանցագործություն անվանեց:

«Անկասկած, դա հանցագործություն էր, սակայն կոչ ենք անում համապատասխան մարմիներին հումանիտար ժեստ կատարել»,- ասաց նա, չմանրամասնելով, թե ինչ <ժեստի> մասին է խոսքը:Սակայն ավելի վաղ Բաքվում արած նրա հայտարարությունը, թե <Լեռնային Ղարաբաղում գտնվող ադրբեջանցի բանտարկյալները, պետք է հանձնվեն Ադրբեջանին՝ որպես բարի կամքի դրսեվորում>, պարզություն է մտցնում նրա խոսքում:

Իսկ հայ լրագրողների հետ հանդիպման ժամանակ Նուլանդը նշել է, որ ամերիկյան կողմի համար շատ մտահոգիչ է ադրբեջանա-ղարաբաղյան սահմանին տեղի ունեցող բռնությունները:

«Այցի ընթացքում նշել եմ, որ ուզում ենք լինեն հանգիստ ժամանակներ, բանակցություններ: Ես այդ մասին խոսել եմ երկու երկրների նախագահների հետ, արյունահեղության դադարեցման մասին, որը կողմերից ոչ մեկին օգուտ չի բերում: Կարծում եմ, որ առաջընթաց կա»: