Հարցազրույց ՀՀԿ խորհրդարանական խմբակցության անդամ ՍՈՒՔԻԱՍ ԱՎԵՏԻՍՅԱՆԻ հետ

-Գյումրիում Ավետիսյանների ընտանիքի անդամների դաժան սպանությունից անցել է 48 օր, սակայն գլխավոր կասկածյալը չի փոխանցվել ՀՀ իրավապահ մարմիններին, հանցագործության նախաքննությունը չի իրականացվում հայ իրավապահների կողմից, ձգձգվում է նախաքննությունը: Այս ամենը մտահոգիչ չե՞ն:

– Անկեղծ ասած, ներկայիս գործընթացում ես որևէ մութ, մտահոգիչ հանգամանքներ չեմ տեսնում: Ասել, թե նախաքննությունը ձգձգվում է, կարծում եմ, ճիշտ չէ, որքան էլ ցանկանանք, որ այն շուտ ավարտ ունենա, պետք է հասկանանք՝ գործ ունենք այնպիսի գործընթացի հետ, որտեղ ցանկություններով պետք չէ առաջնորդվել: Եթե նախաքննությունը դեռ շարունակվում է, կնշանակի կա դրա անհրաժեշտությունը:
Օրերս հայտարարությամբ հանդես եկավ Ավետիսյանների ընտանիքի իրավահաջորդների փաստաբան Երեմ Սարգսյանը ու ասաց, որ հաշվի առնելով կատարված ողբերգության հասարակական հնչեղությունը ու նաև բազմաթիվ փաստաբանների պատրաստակամությունը՝ քրեական գործի շրջանակներում անվճար ներկայացնել տուժողների իրավահաջորդների շահերը, ցանկալի է որ գործով տուժողների իրավահաջորդների շահերի ներկայացուցչությունն իրականացվի փաստաբանական խմբի կողմից: Այսինքն, ամեն ինչ արվում է, որպեսզի հնարավոր մտահոգությունները փարատվեն:
Ընթանում է նախաքննություն, կնշանակի ավելին պահանջելը ճիշտ չէ: Նաև պետք է հասկանալ՝ ի՞նչ պահանջ ենք դնում, ինչի՞ ենք ուզում դրանով հասնել:

-Այս պահին պահանջվում է ՀՀ գլխավոր դատախազի հրաժարականը:

-Ես դա համարում եմ անիմաստ քայլ, որովհետև եթե մարդիկ ասում են պահանջում ենք գլխավոր դատախազի հրաժարականը, պետք է պարզորոշ բացատրեն, թե ինչո՞ւ, ի՞նչ էր պարտավոր նա կատարել, որ չի արել: Երևակայական դաշտից ինչ-որ <փաստեր> են բերում, մինչդեռ չեն բերվում իրավական հստակ հիմավորումներ:

-Հրաժարականի պահանջ ներկայացնողները հայտարարում են՝ չնայած մեկ ամիս է անցել, սակայն դատախազը չի կատարել իր խոստումները՝ մասնավորաբար, չի երաշխավորում մեղադրյալի փոխանցումը ՀՀ իրավապահներին, նաև չի երաշխավորում հանցագործի կամ հանցագործների պատժվելը ՀՀ օրենսդրությամբ։

-Ես ուզում եմ ձեզ տեղյակ պահել, որ նման պահանջ մեր ժողովուրդը չի առաջ քաշում, դա ինչ-որ հասարակական կազմակերպությունների ձեռի գործն է: Իսկ մենք շատ լավ գիտենք, թե ո՞ր հկ-ներն են դրանք, որտեղի՞ց են ֆինանսավորվում և ո՞ւմ պատվերն են կատարում: Ցավոք մեզանում կան կառույցներ, որոնք ավելի շատ զբաղված են հայաստանյան պետական կառույցներին վատաբանելով, քան, երկրի, ժողովրդի խնդիրներով են մտահոգ:

Ուզում եմ հասկանալ ի՞նչ էր պարտավոր անել Գևորգ Կոստանյանը որպես գլխավոր դատախազը, որ չի արել, թող պարզունակ չհնչի խոսքս, բայց, ի՞նչ աներ՝ գնար Պերմյակովի ձեռքից բռներ բերե՞ր: Պահանջ կար, որ նա դիմի Ռուսաստանի Դաշնության իր գործընկերոջը: Փետրվարի 3-ին Գ. Կոստանյանը նամակով դիմեց Յու. Չայկային: Բայց դրանից անմիջապես հետո էլ սկսեցին դարձյալ աղմկել, թե խաբում է, չի դիմել: Այս անգամ էլ ՀՀ գլխավոր դատախազությունը հրապարակեց ՌԴ գլխավոր դատախազությունից ստացված նամակի լուսապատճենը, որով հաստատվեց, որ փետրվարի 3-ին դատախազ Կոստանյանը դիմել է իր ռուս գործընկերոջը՝ Ավետիսյանների ընտանիքիսպանության դեպքի առթիվ հարուցված քրեական գործի վարույթը Հայաստանի իրավապահներին փոխանցելու հարցով: Շրջանառված փաստաթղթում նշված է, որ ՌԴ գլխավոր դատախազությունը քննարկում է Հայաստանի դատախազության դիմումը և արդյունքների մասին առաջիկայում կտեղեկացնի: Գիտեք, ես չեմ ընդունում, երբ փորձ է արվում հանիրավի մեղադրել մեր պաշտոնյաներին, մեղադրել այն դեպքում, երբ գործ է արվում: Բոլորիս խնդիրը մեկն է՝ օբյեկտիվ քննության իրականացում, և որքան հնարավոր է նախաքննության շուտ ավարտ:

-Չե՞ք կարծում, որ մտահոգության պատճառը թափանցիկության, հրապարակայնության բացակայությունն է, Ավետիսյանների հարազատներին՝ նախաքննական մարմնի կողմից հնարավոր տեղեկատվության չտրամադրումը: Միայն վերջերս, հարազատների բողոքից հետո, Քննչական կոմիտեն թույլատրեց նրանց մասնակցել նշանակված փորձաքննություններին:

-Հրապարակայնության խնդիր ես չեմ տեսնում, եթե դրա անհրաժետությունը լիներ, ես ինքս այդ պահանջը կներկայացնեի: Դեռ երկու շաբաթ առաջ քննչական մարմինը Ավետիսյանների հարազատներին հրավիրել էր, զրուցել, եթե կան հարցեր, որոնք նրանց չեն բավարարում, կարող էին, չէ՞, հենց տեղում բարձրաձայնել:
Ինչո՞ւ ենք մոռանում, որ նախաքննական փուլը շարունակվում է ու շատ հարցեր պետք չէ, որ այս փուլում հրապարակային դառնան: Ես զարմանում եմ, որ այս փուլում պահանջվում է թափանցիկություն, ինչո՞ւ չեն ուզում հաշվի առնել, որ այդ թափանցիկությունը կարող է խիստ վատ անդրադառանալ գործի հետագա ընթացքի վրա, ո՞նց կարելի է փաստերը դարձնել հանրության սեփականություն: Ես շատ ուշադիր լսել եմ հարազատների մասնակցությամբ օրերս տեղի ունեցած մամուլի ասուլիսը, Ավետիսյանների աղջիկն ասում էր՝ ինձ տվեք տեղեկատվություն, խոստանում եմ, որ ոչ ոքի չեմ ասի: Սա ճիշտ չէ, ինչպե՞ս կարելի է պահանջել, որ գաղտնիքը տրամադրվի՝ թեկուզ հարազատին, նման բան չի կարող լինել: Թողնենք նախաքննությունն ավարտվի, որից հետո նոր միայն այն հարցերը, որոնք չեն բավարարի նախ Ավետիսյանների հարազատներին, ապա գյումրեցիներին ու մեր հասարակությանը, այդ ժամանակ միայն կփորձենք քննչական մարմնից, դատախազից պահանջել ու ստանալ լրացուցիչ պարզաբանումներ:

Այսօր որևէ մեկը Գյումրիում չի կասկածում, որ Պերմյակովը խստագույն պատժի է ենթարկվելու: Բայց մեր հասարակությունը ուզում է ստանալ երկու հարցերի պատասխանները՝ ինչո՞ւ էր մարդասպանը ընտրել Ավետիսյանների ընտանիքը, և Պերմյակովը արդյոք միայնա՞կ է իրականացրել այդ դաժան սպանությունը, թե՞ իր հետ էլի այլ անձ կամ անձինք են եղել: Այս հարցերի ու դրանց պատասխանների ստացմանն էլ ուղղված է նախաքննությունը: Հորդորում եմ բոլորին լինել համբերատար, մինչև կավարտվի նախաքննությունը:

-Իրականությանը համապատասխանո՞ւմ են որոշ հկ-ների ներկայացուցիչների կողմից տարածվող այն լուրերը, թե Ավետիսյանների հարազատներն այսօր չեն վստահում Հայաստանի Քննչական մարմնին, գլխավոր դատախազությանը, իսկ գյումրեցիների շրջանում կա կասկած, որ քրեական գործում արդեն իսկ շատ բան է կոծկվում:

-Եթե չեն վստահում Հայաստանի Քննչական մարմնին, այդ դեպքում ո՞ւմ են վստահում: Մի կողմից ասում են, գործի նախաքննությունը ռուսներից վերցնենք , ու թող հայկական կողմը իրականացնի այն, պահանջում են կասկածյալին հանձնել հայ իրավապահներին, մյուս կողմից ասում են՝ չեն վստահո՞ւմ:
Իսկ որտեղից ծնվեց այդ կասկածամտությունը, թե գործը կարող է կոծկվել: Եկեք հասկանանք՝ ովքե՞ր են նման <մտահոգություններ> շրջանառում: Արդյոք միտումնավոր չե՞ն մեր պետական մարմինների աշխատանքի հանդեպ նման թերահավատ տրամադրություններ շրջանառվում :
Վստահեցնում եմ ձեզ, որ դրանք շինծու տրամադրություններ են, դրսից ուղղորդվող՝ ներքին կառույցների միջոցով տարածվող:

– Ըստ տեղեկությունների հունվարի 15-ին Գյումրիում տեղի ունեցած բողոքի ցույցի մասնակիցները մեկը մյուսի հետևից բերման են ենթարկվում, նրանց հանդեպ մեղադրանք է առաջադրվում: Չե՞ք կարծում, որ ոստիկանության նման կոպիտ գործողությունները կարող են անկանխատեսելի հետեւանքներ ունենալ:

-Նախ, ոստիկանության կողմից որևէ կոպիտ քայլ չի իրականացվում, իմ տեղեկացմամբ ձերբակալություններ չկան, բայց ցույցի մասնակիցները հրավիրվում են , նրանց հետ զրուցում են, վերցնում բացատրություն: Դա բնական երևույթ է, տեղի է ունեցել անցանկալի միջադեպ, չուսումնասիրվե՞ն եղած նյութերը, չհասկանա՞նք ինչ է կատարվել, ո՞վ է եղել մարդկանց նման գործողությունների դրդողը: Իսկ ինչ է՝ չկանչե՞ն, թողնեին բարձիթողի վիճակում մնա՞, ինչպե՞ս կարելի է: Եթե ցույցի մասնակիցները ճիշտ պահվածք չեն դրսևորել, որի արդյունքում մարդիկ են վիրավորվել, բա ոստիկանությունը բացատրություն չվերցնի՞, որպեսզի հետայսու բացառվեն նման դեպքերը: Ես դեմ եմ բոլորին ձերբակալելուն, բայց կողմ եմ, որ կանչեն, զրուցեն, մարդկանց լսեն ու գտնեն դրդապատճառը, գտնեն մեղավորներին:
Իսկ այսօր Գյումրիում չկա այնպիսի իրավիճակ, որը հղի լինի անկանխատեսելի հետեւանքներով: Ավետիսյանների հարազատները պարբերաբար հանդիպում են մարզային իշխանությունների հետ, համատեղ քննարկում խնդրները:
Ես կոչ կանեմ բոլորին՝ անհիմն չխոսել, չշրջանառել իրականության հետ կապ չունեցող մտքեր, թե Գյումրիում լարված վիճակ է: Նման բան չկա, թողեք գյումրեցին զբաղվի իր առօրյա հոգսերով, պատկան մարմիններն էլ իրականացնեն իրենց պարտականությունները: Իսկ նրանք, ովքեր փորձում են Գյումրիում իրավիճակ սրել, ես նրանց համարում եմ գյումրեցիների թշնամիներ:

ԱՐՄԻՆԵ ՍԻՄՈՆՅԱՆ