Եթե ՄԱԿ-ում նիստ էր «գալոչկա» դնելու համար` հետևանքները շատ վատ են լինելու
249-րդ օրն է, որ Արցախը գտնվում է ադրբեջանական շրջափակման մեջ՝ զրկված հումանիտար աջակցությունից։ Արցախում գրանցվել է սովամահության առաջին դեպքը: Ավելի վաղ երկու մանկահասակ երեխա էր մահացել։
Ինչպես հայտնի է օգոստոսի 16-ին, ՄԱԿ Անվտանգության խորհուրդն արտակարգ նիստ գումարեց, որտեղ քննարկվեց Ադրբեջանի կողմից իրականացվող լիակատար շրջափակման հետևանքով Արցախի Հանրապետությունում ստեղծված ծանրագույն իրավիճակը։
Արտակարգ նիստ հրավիրելու պահանջով ՄԱԿ անվտանգության խորհրդի նախագահին նամակով դիմել էր Հայաստանի Հանրապետությունը։
Դեռևս որևէ հայտարարություն ու բանաձև ՄԱԿ-ը չի ընդունել։
Արցախի Հանրապետության նախագահի խորհրդական, հատուկ հանձնարարությունների գծով ներկայացուցիչ, ԱԳ նախկին նախարար Դավիթ Բաբայանը խոսելով ՄԱԿ Անվտանգության խորհրդի նիստի մասին, ասել է. ցանկալի է, որ այս նիստին հետևի հատուկ բանաձևի ընդունում, պարտադիր բանաձևի։
«Կոչերն արդեն անիմաստ են, եթե սա վերջանա հերթական կոչով կամ ուղղակի քննարկմամբ, ուրեմն՝ իրավիճակը շատ ավելի է բարդանալու։ Եթե ամբողջ աշխարհի առաջ մի ողջ ժողովուրդ սովամահ է լինում, և որևէ կոնկրետ քայլ չի ձեռնարկվում որևէ մեկի կողմից, սա պարզապես խայտառակություն է, ի՞նչ ասեմ»,- նշեց Դավիթ Բաբայանը։
Նիստի շրջանակներում տարբեր երկրների ներկայացուցիչներ ելույթներով հանդես եկան՝ հնչեցնելով իրենց գնահատականները ստեղծված իրավիճակի վերաբերյալ, հարցին՝ արդյո՞ք նրանք իրենց ելույթներով կարողացան ներկայացնել Արցախում ստեղծված իրավիճակն ամբողջությամբ, Դավիթ Բաբայանը պատասխանեց, որ այդ հայտարությարունները ցույց էին տալիս, որ իսկապես Արցախում իրավիճակը բարդ է։
«Սակայն պարադոքսն այն է, որ նման հայտարարություններից հետո պետք է արդեն քայլեր ձեռնարկվեին, եթե քայլեր չեն ձեռնարկում, ապա սա շատ վատ է, որովհետև բոլորն ասում են, որ Արցախում սով է, Արցախը շրջափակված է, այսինքն՝ բոլորը դրա մասին խոսում են, հետևաբար՝ եթե սա լինի լոկ հանդիպում՝ հանդիպման համար, քննարկում՝ քննարկման համար, «գալոչկա» դնեն, ուրեմն՝ հետևանքները շատ ավելի վատ է լինելու»,- հավելեց նա։
Դավիթ Բաբայանը նկատում է` հայտարարություններից պետք է անցնել գործի։
«Հայտարարությունները կարող է շատ լավը լինեն, ճիշտ արտացոլեն իրավիճակը, սակայն, եթե քայլ չի արվում այն հանգուցալուծելու համար, և եթե մարդը սովամահ է լինում, ապա այս հայտարարություններով կարողանալո՞ւ են սնվել ու չմահանալ, իհարկե ոչ։ Այդ հայտարարություններին պիտի հետևեն քայլեր»,- եզրափակեց Դավիթ Բաբայանը։
Դիտել NKR, TOP, Արցախ 24, ԼՂ Հանրապետություն, Լրահոս բաժնի բոլոր նյութերը
