«Գիշերը Ստեփանակերտից մարդկանց մեծ հոսք գնաց այդ հատված, սակայն ասկերանցիները առաջարկել են, որպեսզի իրենք հսկեն եւ ասել են, որ թույլ չեն տալու՝ որեւիցե մեկը մտնի: Ասկերանցիներն այս պահին վրաններով հերթապահություն են անում: Ռուսական կողմն էլ խոստացել է, որ իրենք թույլ չեն տալու, որ որեւէ մեքենա անցնի դեպի Ասկերան: Մենք ունենք մեր որոշումը, եւ որեւէ բան չի փոխվել»,- այս մասին ասել է ԱՀ Ազգային ժողովի «Արդարություն» խմբակցության պատգամավոր Մետաքսե Հակոբյանը։

 Նա շեշտել է` ադրբեջանական այսպես կոչված՝ «մարդասիրական» բեռները թույլ չենք տալու, որ մտնեն Ստեփանակերտ, արցախահայությունը թույլ չի տա Արցախի իշխանություններին` բացել Աղդամի ճանապարհը. «Չեմ կարծում, որ Արցախի իշխանությունները կգնան նման արկածախնդրությանը»:

Անդրադառնալով Ֆրանսիայի կողմից դեպի Կոռնիձորի ուղղությամբ ուղարկվող հումանիտար բեռներին՝ Արցախի պատգամավորն ասել է.

«Մենք իրականում հոգնել ենք, մեզ մոտ բացի զայրույթից այլ զգացում չկա: Այն գործիքակազմը, որն ունեն սկսած ՀՀ իշխանություններից վերջացրած տարբեր երկրներով ու, մասնավորապես, Ֆրանսիայով, իրենք այդ գործիքակազմը կարող են օգտագործել, որպեսզի ի վերջո գործնական քայլեր կատարվեն, այսինքն՝ օրինակ Ադրբեջանի նկատմամբ սանկցիաներ կիրառվեն: Այդ բեռներն ուղարկողները շատ լավ հասկանում են, որ դրանք այդտեղ անժամկետ մնալու են: Այսօր նրանք խաղում ենք արցախցիների զգացմունքների հետ, որովհետեւ շատերը չեն էլ պատկերացնում այդ քաղաքական իրավիճակը»: