Ֆրանսիան ՄԱԿ-ում կպահանջի ընդունել ԼՂ հայերի վերադարձի վերաբերյալ բանաձև.Կոլոննա
Ֆրանսիան ՄԱԿ-ի Անվտանգության խորհրդի շրջանակներում կպահանջի բանաձևի ընդունում, որը պայմաններ կստեղծի հայերի Լեռնային Ղարաբաղ վերադարձի համար։
Այս մասին հայտարարել է Ֆրանսիայի ԱԳՆ նախարար Կատրին Կոլոննան՝ ելույթ ունենալով հանրապետության Սենատում։
Այդ պայմանները պետք է ներառեն Ղարաբաղի հայերի, այդ թվում՝ պատմամշակութային իրավունքների պահպանման ամուր երաշխիքներ։ Դրա համար անհրաժեշտ է մշտական միջազգային ներկայություն տեղում, և Ֆրանսիայի բոլոր ջանքերի նպատակը դրան հասնելն է, հավելել է նախարարը։
«Բոլորն էլ հասկանում են Մերձավոր Արևելքի ճգնաժամի լրջությունը, բայց պետք է նաև դիտարկել իրավիճակը Հարավային Կովկասում, մասնավորապես՝ Հայաստանում: Այո, Ադրբեջանը ծրագրել և կազմակերպել է ավելի քան 100 հազար հայերի փախուստը Լեռնային Ղարաբաղից, սա չափազանց ծանր հանցագործություն է, որին չի կարող չհետևել հակազդեցությունը»,- ասաց նախարարը։
Նախարարի խոսքով՝ նրան մնում է միայն հետևելով վարչապետ Էլիզաբեթ Բորնին կրկնել, որ «ոչ մի երկիր Հայաստանի համար այնքան չի անում, որքան Ֆրանսիան»։ Հայաստանի և Ադրբեջանի միջև հակամարտության լուծումը հնարավոր է գտնել միայն բանակցությունների միջոցով, և խաղաղությունը պետք է լինի արդար և երկարաժամկետ,-հավելել է նա։
Այդ իսկ պատճառով Ֆրանսիան աջակցում է Եվրամիության միջնորդական ջանքերին և պահանջում, որ զիջումներ չլինեն միջազգային իրավունքին, Հայաստանի ինքնիշխանությանն ու տարածքային ամբողջականության հարցում։
Դիտել Politics, Լրահոս, Քաղաքականություն բաժնի բոլոր նյութերը
