Նախկին ԱԳ նախարար Վահան Փափազյանն այսօր հայտարարեց, թե  հայ–թուրքական կարգավորման հարցը Հայաստանի արտաքին քաղաքականությունում առկա է եղել սկսած անկախության առաջին տարիներից, որ  դեռևս  1992 թվականին մի փաստաթուղթ է պատրաստվել, որը, սակայն, մինչ օրս  չի ստորագրվել: Ներկայիս պետական այրերին Վ. Փափազյանն առաջարկեց  այսօր հրապարակել 92-ի այդ փաստաթուղթը և  հնարավորություն ընձեռել համեմատելու այդ երկու փաստաթղթերը, այսինքն` ներկան և նախկինը: Նկատեց, որ  իրենց պատրաստած փաստաթուղթն էականորեն տարբերվում է հայ–թուրքական հարաբերությունների կարգավորման   այսօրվա Արձանագրություններից։ Մասնավորապես, ըստ նրա, 92–ի փաստաթղթում Ցեղասպանության  ու  սահմանների ճանաչման   մասին խոսք չկար։

«Լևոն Տեր-Պետրոսյանը   արտաքին քաղաքականության հրատապ հարցերի շարքից հանել էր Ցեղասպանության հարցը, նկատի ուենալով այն, որ  եթե Ցեղասպանության հարցը դառնա  օրակարգային, ապա Թուրքիան դրան կհակազդի»:  Ապա սկսեց մեղադրել երկրորդ նախագահ Ռոբերտ Քոչարյանին, որի իշխանության օրոք` 1998 թվականին, ցեղասպանության հարցը դարձավ արտաքին քարոզչության անկյունաքարերից մեկը: Հետևաբար, այդ հարցում զիջումներ եղան հենց այդ շրջանից»: Ըստ Փափազյանի, Հայոց ցեղասպանության ճանաչումը օրակարգ մտցնելու արդյունքը եղավ այն, որ այսօր ներկայացված Արձանագրություններում տեղ է գտել պատմաբանների ենթահանձնաժողովի ստեղծման մասին դրույթը։

ArmAr.am