Երեկ Թուրքիայի կառավարության նիստի ավարտից հետո  այդ երկրի փոխվարչապետ և պետքարտուղար Ջեմիլ Չիչեկը հայտարարել է, որ հաջորդ շաբաթ հայ-թուրքական Արձանագրությունները քննարկման ու վավերացման նպատակով  կուղարկվեն Թուրքիայի խորհրդարան:

Նա լրագրողներին ասել է, որ ամսաթիվը դեռևս հստակեցված չէ: Ապա հավելել է, թե միայն խորհրդարանն է որոշելու` քվեարկե՞լ արձանագրությունների օգտին, թե՞ ոչ:

Նա ասել է, թե Թուրքիայի քաղաքականության  մասն է կազմում Հայաստանի հետ հարաբերությունների կարգավորումը:   Չիչեկն  ակնարկել է, թե պաշտոնական Անկարան պատրաստ է պատմության դեմ հանդիման կանգնել և ապացուցել, թե «1915թ. իրադարձություններում ինչն է ճշմարիտ և ինչը` սուտ»:

Տեղեկացնենք նաև, որ Թուրքիայի Ազգային անվտանգության խորհուրդը, նախագահ Աբդուլա Գյուլի գլխավորությամբ, պատրաստվում է նախագահական նստավայրում հոկտեմբերի 20-ին նիստ անցկացնել: Չնայած դեռ չի հստակեցվում, թե ինչ հարցեր են քննարկվելու, սակայն վերլուծաբաններն արդեն իսկ ենթադրում են, որ հիմնական հարցը լինելու է հայ–թուրքական հարաբերությունների խնդրի քննարկումը:

Armar.am