Քաղաքական գիտությունների թեկնածու Լևոն Շիրինյանը «Արմատ»մամուլի ակումբում հրավիրված ասուլիսի ժամանակ անդրադարձավ Հայաստանի Հանրապետության և Թուրքիայի միջև նախաստորագված արձանագրություններին և ՀՀ ղեկավարության կատարած քայլերն անվանեց դիվանագիտորեն ճիշտ մշակված.

«Հայաստանը սրանով ներքաշվեց համաշխարհային քաղաքականության բարձր ոլորտներ: Այսօր մենք պետք է ճշգրտենք մեր հետագա անելիքները և  փորձենք իրականությունը տեսնել այնպես, ինչպիսին որ այն կա և ոչ թե այնպես, ինչպես կցանկանայինք տեսնել»:

Լևոն Շիրինյանը քաղաքագիտության տեսանկյունից երկու սցենար տարանջատեց.

«Առաջին` հայկական կողմը կարող էր մերժել, դադարեցնել գործընթացը, որն իմ կարծիքով ընդունելի չէ, քանի որ մենք պետք է գետի հունով լողանք, որպեսզի չհանդիպենք խութերի: Ներկա իրավիճակը ոչ թե ճգնաժամային, այլ շրջադարձային է, ու պետք է խաթարվի անվստահության զգացումը: Երկրորդ` Թուրքիան ցույց տվեց իր իրական դեմքը` փորձելով իր ելույթով փոխել արձանագրությունների բովանդակությունը: Սակայն մեր Արտաքին գործերի նախարար Էդվարդ Նալբանդյանը շատ ճիշտ և հստակ քայլ կատարեց` թույլ չտալով սցենարի նման զարգացում, այլապես  հետագայում չէր բացառվի, որ փորձեին այդ ելույթն ու արձանագրությունները ներակայացնել որպես մի ամբողջություն` վտանգելով հայկական կողմի շահերը: ՀՀ ԱԳ նախարար Էդվարդ Նալբանդյանի կեցվածքը շատ արժանապատիվ էր, պետք է մինչև վերջ այդ կերպ աշխատել»:

Միաժամանակ Լևոն Շիրնյանը գտնում է, որ պետք է սթափ գործել` հաշվի առնելով նաև վերջերս Թուրքիայի ԱԳ նախարար Ահմեդ Դավութօղլու հայտարարությունը,  թե` որքան հեռու արձակենք արևելքում մեր նետը, այնքան արևմուտքում ամուր կհաստատվենք: Շիրինյանը համոզված է, որ ճիշտ դիվանագիտություն բանեցնելով` հայկական կողմն իր  հակառակորդին հնարավորություն չի տա շարունակելու իր խաղերը, այն է` վերջին վայրկյանին անգամ որքան հնարավոր է շատ զիջումներ կորզել Հայաստանից:

Լևոն Շիրինյանը հույս հայտնեց, որ Արցախի հարցում որևէ զիջում չի լինի, այլապես մենք կլինենք խոցելի, իսկ թուրքական գորշ գայլերի միջավայրում ոչնչացնում են բոլոր նրանց, ովքեր թույլ են: «Իսկ այս փուլում մեր դիվանագիտությունն ապացուցեց, որ մենք կարող ենք պայմաններ թելադրել»:

Ա. Կ.

Թեգեր` Ահմեդ Դավութողլու, արձանագրություններ, Արցախ, Էդվարդ Նալբանդյան, Թուրքիա