Այս տարվա եղանակային անբարենպաստ պայմաններն իրենց բացասական ազդեցությունն ունեցան նաև միրգ ու բանջարեղեն մթերող ընկերությունների վրա, դա է պատճառը, որ  «Արցախ‎ ֆրութ» ընկերությունում տարվա արդյունքներից առանձնապես գոհ չեն:

2009թվականից  առ այսօր «Արցախ‎ ֆրութ»-ը մթերել է մոտ 300 տոննա տարբեր տեսակի բանջարեղեն ու հատապտուղ, հիմնականում` լոլիկ, բադրիջան, բիբար, հոն և մոշ:

Ընկերության տնօրեն Գագիկ Ներսիսյանը նշում է. «Այս տարվա պլանները, փաստորեն, ամբողջությամբ  չիրականացվեցին: Մթերման ցուցանիշները անբավարար են, համենայն դեպս`  ավելի մեծ ծավալներ էինք  նախատեսել»:

Տարվա  արդյունքներից գոհ չեն նաեւ հողօգտագործողները: Քաշաթաղի շրջանի Երիցվանք համայնքի բնակիչ Զարզանդ Միքայելյանը, որը ընկերության մատակարարներից մեկն է` դժգոհ է ստացված բերքից: Արդեն երկրորդ տարին է, ինչ համագործակցում է «Արցախ‎‎ֆրութ»-ի հետ: Այս տարի անբարենպաստ եղանակը թույլ չտվեց ժամանակին եւ նախատեսված ծավալներով իրականացնել պայմանագրային պարտավորությունները: Ընկերությունում որպես ձեռքբերում արձանագրում են այն փաստը, որ այս տարվա արտադրանքի սպառման հարցն արդեն կարգավորված է: Աշխատանքներ են ընթանում նոր պայմանագրեր կնքելու եւ  շուկան արտասահմանյան երկրներում ընդլայնելու համար:

Ինչպես տեղեկացրեց «Արցախ‎ ֆրութ» ՓԲԸ տնօրեն Գագիկ Ներսիսյանը, ընկերության արտադրանքն արտահանվում է ոչ միայն Հայաստանի Հանրապետություն, այլեւ  Ռուսաստանի Դաշնություն եւ Ուկրաինա: Ընկերության արտադրանքը թե ներքին, թե արտաքին շուկայում սպառողին է ներկայանում «Արցախ ‎ֆրութ» ապրանքանիշով, ինչը Գագիկ Ներսիսյանի   խոսքերով` Արցախը ներկայացնելու եւս մեկ տարբերակ է:

Նորայր Հովսեփյան

Ստեփանակերտ