Օրերս Մարտունու շրջանի Սպիտակաշեն գյուղում դպրոցի նոր շենքի բացման արարողություն էր: Այդ առթիվ Սպիտակաշեն էին եկել ԼՂՀ կրթության և գիտության նախարար Վլադիկ Խաչատրյանը, Մարտունու շրջվարչակազմի ղեկավար Լյուդմիլա Ազիզյանը, «Հայաստան» համահայկական հիմնադրամի ղեկավարները, հյուրեր:

Դպրոցի բացման պատիվը վերապահված էր գյուղի վաստակաշատ  ուսուցչուհի Թամարա Սաղյանին և «Հայաստան» համահայկական հիմնադրամի գործադիր տնօրեն  Արա Վարդանյանին:

ԼՂՀ կառավարության եւ «Հայաստան» համահայկական հիմնադրամի համաֆինանսավորմամբ իրականացված հերթական ծրագրի արդյունքում Սպիտակաշենն այսօր ունի դպրոցի երկհարկ տիպային շենք` ներկնահարկով և վերնահարկով: Նորակառույց դպրոցն ապահովված է բաց մարզահրապարակով, ճեմուղով, լուծված է ջեռուցման խնդիրը: Դեռևս չլուծված հարցերի թվում է դպրոցի ջրամատակարարման խնդիրը: Պատասխանատուները վստահեցնում են` այս հարցն էլ շուտով կլուծվի:

Շուրջ 188 մլն դրամ արժողությամբ աշխատանքներն իրականացվել են  «Նվեր»  ՍՊԸ-ի կողմից: Շինարարական աշխատանքները տևել են գրեթե մեկ տարի:

Շինարարության ողջ ընթացքում պարբերաբար իրականացվել են որակի հսկողության աշխատանքեր թե հիմնադրամի և թե կառավարության կողմից:

Նորայր Հովսեփյան