Եվրամիությունն առաջիկայում մտադրություն ունի արբանյակների օգնությամբ հետևելու Աբխազիայի և Հարավային Օսեթիայի ռազմական ակտիվությանը։

Եվրամիության դիտորդական առաքելության ղեկավար Հանս-Յորգ-Հաբերի խոսքով՝ նման որոշում կայացնելու պատճառն այն է, որ Եվրամիության  դիտորդները հնարավորություն չունեն այցելել նշյալ երկրներ։ Նա ընդգծել է նաև, որ Եվրամիությունը մտադրություն չունի ճանաչելու Աբխազիայի և Հարավային Օսեթիայի անկախությունը։

Եվրամիության անվտանգության քաղաքականության հարցերով դեսպանն էլ Թբիլիսի կատարած այցի ընթացքում, իր հերթին նշել է, որ Եվրամիությունը մեկ անգամ ևս Ռուսաստանի առջև կբարձրացնի Հարավային Օսեթիայում և Աբխազիայում եվրամիության դիտորդների ներկայության անհրաժեշտության խնդիրը։

Աբխազիայում անհանգստացած են իրադարձությունների նման ընթացքով։ Աբխազիայի պաշտպանության նախարար Մերաբ Քիշմարիան հայտարարել է, որ այս ամենը խոսում է այն մասին, որ Վրաստանը հերթական ագրեսիան է նախապատրաստում Սուխումիի և Ցխինվալիի վրա։ Նախարարի խոսքով՝ այդ մասին են վկայում նաև եվրախորհրդի մտադրությունները՝ արբանյակներով վերահսկելու Աբխազիայի և Հարավային Օսեթիայի տարածքները։

ArmAr.am