Նոյեմբերի 16-ին Ազային ժողովի նախագահ Հովիկ Աբրահամյանն ընդունեց Հայաստանում Եվրոպական հանձնաժողովի պատվիրակության ղեկավար դեսպան Ռաուլ դե Լյուցենբերգերին, Հայաստանում Եվրոպական միության (ԵՄ) խորհրդատվական խմբի ղեկավար Ռոլֆ Բյոնկեին և նույն թիմի անդամ` ՀՀ ԱԺ նախագահի խորհրդատու Էդուարդո Լորենցո Օչոային:

Ողջունելով զրուցակիցներին` ՀՀ ԱԺ նախագահը ողջունեց ԵՄ խորհրդատվական խումբ ստեղծելու ՀՀ Նախագահի նախաձեռնությունը: Կարևորելով ԵՄ հետ համագործակցության զարգացումը` պարոն Աբրահամյանը հույս հայտնեց, որ ՀՀ ԱԺ-ում ԵՄ խորհրդատուի աշխատանքը կնպաստի Հայաստանի եվրոինտեգրմանը, իսկ Եվրոպական խորհրդարանում նրա ունեցած հարուստ աշխատանքային փորձն օգտակար կլինի այդ մարմնի հետ ՀՀ ԱԺ հարաբերությունները խորացնելու համար:

Այնուհետև զրուցակիցները քննարկեցին ՀՀ ԱԺ-ում ԵՄ խորհրդատուի գործունեությունը սկսելու հետ կապված աշխատանքային և կազմակերպչական հարցերը: Պարոն Լորենցո Օչոան ՀՀ ԱԺ նախագահին փոխանցեց Եվրախորհրդարանի նախագահ Եժի Բուզեքի ջերմ ողջույնները: Զրուցակիցները նախանշեցին այն ոլորտները, որտեղ ԵՄ խորհրդատուն կարող է օգտակար լինել ՀՀ ԱԺ-ին և պայմանավորվեցին խթանել համատեղ աշխատանքը:

ՀՀ ԱԺ հասարակայնության եւ տեղեկատվության միջոցների հետ կապերի վարչություն