«Մեռիր այնպես, որ անգամ մահդ հայրենիքիդ ծառայի». հայոց մեծերի այս պատգամով Արցախի ազատության համար իրենց կյանքը զոհաբերեցին հազարավոր հայորդիներ: Եվ տարիների ընթացքում նրանց հարազատների կորստի ցավի հետ մեծանում է հայրենիքի շենացման գործի պարտքի գիտակցությունը, որը հենց իրենց` զոհված ազատամարտիկների պատգամն է:

1994 թվականից գործող` Զոհված ազատամարտիկների հարազատների միության գործունեությունը հենց դրան է ուղղված: Միության  աշխատանքները  պարբերաբար գումարվող համաժողովների ընթացքում  են ամփոփվում, նախանշվում  են հետագա անելիքները:

Միության` այսօր կայացած  8-րդ համաժողովին  ներկա էին ԼՂՀ   բարձրաստիճան պաշտոնյաներ` նախագահ Բակո Սահակյանի գլխավորությամբ, բարձրաստիճան սպայակազմի ներկայացուցիչներ,  հյուրեր ՀՀ-ից:  Համաժողովի պատվիրակներին  ողջույնի ուղերձ էր հղել ՀՀ պաշտպանության նախարար Սեյրան Օհանյանը:

Միության նախագահ Գալյա Առստամյանը ներկայացրեց հաշվետու ժամանակահատվածում միության գործունեությունը. շարունակվել է զոհված ազատամարտիկների ընտանիքներին ցուցաբերվող օժանդակությունը, տարբեր առիթներով միջոցառումների կազմակերպումը, ընդլայնվել են միության կապերը, շրջաններում տարվող աշխատանքները հստակեցվել են: Սա միության գործունեության միայն ընդհանուր պատկերն է: Այդ ճանապարհին շատերն են օժանադակել Զոհված ազատամարտիկների հարազատների միությանը. կազմակերպության նախագահը նրանց հիշատակեց անուն առ անուն:

Այս ընթացքում բարեկարգվել է զոհված ազատամարտիկների հուշաթանգարանը: Այստեղ արդեն հարյուրավոր նմուշներ են հավաքվել: Տարվա ընթացքում թանգարանը 14 հազար այցելու է ունեցել ինչպես  հանրապետությունից, այնպես էլ արտասահմանից: Թանգարանն իր մասնաճյուղն ունի նաև Մարտակերտում:

Միությունը շարունակում  է ակտիվ համագործակցել ՊԲ-ի հետ: Շնորհավորանքի խոսքում  ԼՂՀ պաշտպանության նախարար, պաշտպանության բանակի հրամանատար Մովսես Հակոբյանը կարևորեց այդ համագործակցությունը հատկապես  նորակոչիկների ռազմահայրենասիրական ոգին բարձրացնելու առումով:

Կազմակերպության գործունեությունը դրական գնահատեց վերստուգիչ հանձնաժողովը:

Համաժողովն ընտրեց միության վարչության եւ վերստուգիչ հանձնաժողովի նոր կազմ:

Համաժողովի աշխատանքն ավարտվեց Զոհված ազատամարտիկների հարազատների միության աշխատանքների մասին պատմող տեսաֆիլմի ցուցադրությամբ:

Նորայր Հովսեփյան