Ինչպե՞ս է գնահատվում Թուրքիայի` Եվրամիություն մուտք գործելու հնարավորությունները: Նման հարցով իր անգլիացի պաշտոնակցին է դիմել Թուրքիայի վարչապետ Ռեջեբ Թայիբ Էրդողանը:

Էրդողանի մտահոգությունները կապված են Եվրամիության նոր` ոչ  թուրքասեր նախագահ Հերման Վան Ռոմպեայի ընտրությամբ:

Ադրբեջանական «Bakililar» պարբերականը Թուրքիայի` եվրաընտանիք ներխուժելու փորձերը անհիմն է համարում, այն համոզմունքով, որ`  «Եվրամիությունը մոտակա տարիներին Թուրքիային իր կազմում ընդգրկելու միտք անգամ չունի»:

Թուրքիայի հետ կապված խնդիրները բազմազան են: Բրյուսելը դժգոհություն է հայտնում հիմնականում Թուրքիայում մարդու իրավունքների ու, ընդհանրապես, ժողովրդավարության սկզբունքների անհույս վիճակի հետ կապված:

Նշենք, որ իր հերթական ելույթներից մեկում ԵՄ նախագահը նշել էր. «Թուրքիան Եվրոպայի մասը չի կազմում և ԵՄ ընդլայնումը չի կարող իրականացվել Թուրքիայի անդամակցությամբ»:

Ռոմպեայի կարծիքով, քրիստոնեության գաղափարախոսության վրա հիմնված Եվրոպական արժեքները կվտանգվեն այն պահից, երբ նման մեծ իսլամական երկիրը, ինչպիսին  Թուրքիան է, Եվրոպական ընտանիքի անդամ դառնա:

ԵՄ վերջին հայտարարության ընթացքում ներկայացվել է այն երկրների ցանկը, որոնց մուտքը Եվրամիության համար հեռանկարային է  համարվում, որտեղ Թուրքիայի հետքն անգամ չկա:

Վերը նշված ադրբեջանական պարբերականը մեկնաբանում է, որ Հայաստանի հետ հարաբերությունների հաստատման ներկայիս գործընթացն անգամ Թուրքիային չի փրկի:

ArmAr.am