«Պետք է ամուր կառչել այդ հայտարարություններից, որոնցում միջազգային փորձագետներն ու բարձրաստիճան անձինք տարանջատում են հայ-թուրքական հարաբերություններն ու Արցախի հարցը»,- «Փաստարկ» մամուլի ակումբում լրագրողների հետ հանդիպման ժամանակ հայտարարեց «Ժառանգություն» խմբակցության ղեկավար, ԱԺ պատգամավոր  Ստեփան Սաֆարյանը:

Ս. Սաֆարյանը կարծում է նաև, որ հակառակ դեպքում հայ-թուրքական հարաբերությունների կարգավորմանը ստիպված պետք է լինեն սպասելու Արցախի հարցի լուծումից հետո, իսկ դա, ըստ բանախոսի, անտեսանելի ապագայում է, այսինքն, երկու հարցերը` մեկը մյուսով պայմանավորելը «նպատակահարմար չէ ոչ հայկական, ոչ հակառակ կողմի համար»:

«Ժառանգություն» խմբակցության ղեկավարը կարծում է, որ «հայկական դիվանագիտության համար բախտորոշ պահ է եկել, որից օգտվելու շատ ուղիներ կան: Հայկական պատվիրակությունը միջազգային ասպարեզում կարողացել է միջազգային դիվանագիտական աստղաբույլին համոզել, որ երկու հարաբերություններն իրար կապելն ու մեկը մյուսով պայմանավորելն անհեռանկար գործ է»:

Սաֆարյանը վտանգավոր է համարում ադրբեջանական կողմի հաճախակի հնչեցվող այն տեսակետները, թե հայ-թուրքական հարաբերությունների կարգավորումից հետո Հայաստանն այլևս «աչքաթող» կանի Արցախի հարցը. «Այսօր, սակայն, Հայաստանը փորձում է կամք դրսևորել` հաճախակիացնելով իր հանդիպումներն Ադրբեջանի հետ` Արցախի խնդրի համատեքստում: Բայց մենք այսպիսով Արցախի խնդիրն ուղղակի կախվածության մեջ կդնեն հայ-թուրքական հարաբերություններից, Արցախի հարցն այդ հարաբերությունների պատանդը կդառնա»,-եզրափակում է Ստեփան Սաֆարյանը:

ArmAr.am