Թուրքիայի վարչապետ Ռեջեփ Թայիփ Էրդողանը ԱՄՆ-ի նախագահ Բարաք Օբամայի հրավերով  մեկնել է Վաշինգտոն:

Օդանավակայանում` լրագրողներին  տված ճեպազրույցում նա տեղեկացրել է, որ դեկտեմբերի 7-ին հանդիպելու է Բարաք Օբամայի հետ և որ ԱՄՆ-ի նախագահի հետ պատրաստվում են քննարկել տարածաշրջանային և գլոբալ խնդիրներ: Առավել ստույգ` անդրադառնալու են Իրաքում, Աֆղանստանում, Պակիստանում, Մերձավոր Արևելքում, Բալկաններում, և Կովկասում տիրող իրավիճակին, ինչպես նաև ահաբեկչության դեմ պայքարի, համաշախարհային տնտեսական ճգնաժամի, կլիմայական փոփոխությունների խնդիրներին:

Սպասվում է, որ Սպիտակ տանը Էրդողանը հդարձյալ կվերահաստատի, թե իրենք չեն պատրաստվում զորք ուղարկել Աֆղանստան, բացի այդ կանդրադառնա հայ-թուրքական հարբերությունների բարելավման  ուղղությամբ ընթացող գործընթացին և կխնդրի արագացնել ղարաբաղյան հիմնախդրի լուծումը:

Թուրքիայի վաչապետը Վաշինգտոնում  պատրաստվում է հանդիպել նաև մի շարք կոնգրեսականների հետ և բանավեճեր անցկացնել   Հայոց ցեղասպանությունը ճանաչող ու դատապարտող օրինագծերի շուրջ:

Ըստ թուրք վերլուծաբանների` այս այցի ընթացքում ԱՄն-ն փորձելու է պարզել Թուրքիայի դիրքորոշումը տարածաշրջանի մի շարք խնդիրներում:

Չնայած Թուրքիան այսօր հայացքն ուղղում է դեպի Արևելք, սակայն հասկանալի է, որ ԱՄՆ-ի հետ Թուրքիայի համագործակցությունը կշարունակվի: Պաշտոնական Անկարան վստահ է, որ ԱՄՆ-ն Իրաքից դուրս գալուց հետո կցանկանա տարածաշրջանում խաղաղարար դերակատարումը  վերապահել Թուրքիային, որպես իր դաշնակցի: Ինչից կարելի է եզրակացնել, որ ԱՄՆ չի ցանկանա բարդացնել հարաբերությունները Թուրքիայի հետ:

Քրիստինե Մելքոնյան