Վարչապետ Տիգրան Սարգսյանն այսօր ընդունել է ՀՀ-ում Արժույթի միջազգային հիմնադրամի մշտական ներկայացուցիչ Նինկե Օմեսին` Հայաստանում աշխատանքային առաքելությունն ավարտելու կապակցությամբ, եւ այդ պաշտոնում նրան փոխարինող Գիերմո Տոլոսային:

Վարչապետը ՀՀ կառավարության անունից ջերմ շնորհակալություն է հայտնել Նինկե Օմեսին մեր երկրում արդյունավետ աշխատանքի համար, ճանաչողական զրույց ունեցել  Գիերմո Տոլոսայի հետ, ով մինչեւ  նոր պաշտոնին անցնելը պաշտոնավարել է ԱՄՀ ռազմավարության, քաղաքականության եւ ուսումնասիրության դեպարտամենտի նոր ձեւավորվող շուկաների բաժնում:

Զրուցակիցները մտքեր են փոխանակել ֆինանսատնտեսական ճգնաժամի հետեւանքով առաջացած խնդիրների շուրջ:

Վարչապետ Տիգրան Սարգսյանը խոսել է ճգնաժամի  հարուցած հետեւանքներին դիմակայելու ուղղությամբ կառավարության գործադրած ջանքերի, Հայաստանի տնտեսության վրա նրա ունեցած դրսեւորումների մասին, նշել այն խնդիրներն ու ուղղությունները, որոնք  առաջիկայում եւս գտնվելու են ՀՀ կառավարության եւ Արժույթի միջազգային հիմնադրամի համագործակցության շրջանակում: Կառավարության ղեկավարը հույս է  հայտնել, որ ԱՄՀ նոր մշտական ներկայացուցչի հետ աշխատանքը կլինի նույնքան արդյունավետ:

Նինկե Օմեսը շնորհակալություն է հայտնել բարեմաղթանքի ջերմ խոսքերի եւ իր գործունեությունը գնահատելու համար, վստահեցրել, որ ԱՄՀ-ն կշարունակի աջակցությունը Հայաստանում իրականացվող բարեփոխումներին եւ հնարավորինս կօժանդակի մեր երկրին հաղթահարելու առկա հիմնախնդիրները:

ArmAr.am