ԼՂՀ կառավարությունը վարելահողերի կոլեկտիվ մշակության փորձ է նախաձեռնել Ամարասի գոտում: Այդ ծրագրի  ընթացքին ու հետագա անելիքներին էր նվիրված վարչապետ Արա Հարությունյանի` օրերս հրավիրած խորհրդակցությունը` գյուղնախարար Արմո Ծատրյանի, Մարտունու և Ասկերանի շրջանների վարչակազմերի ղեկավարների, Ամարասի գոտում հողատարածքներ ունեցող համայնքների ղեկավարների և սեփականատերերի մասնակցությամբ:

Կարկտահարված 1300 հեկտար տարածքներում իրականացվող գյուղատնտեսական  այդ ծրագիրը լավ արդյունքներ է խոստանում` հայտարարել է վարչապետը: Ֆինանսական կամ նյութական փոխհատուցում տալու փոխարեն` պետական ընկերությունների միջոցով լավագույնս կմշակվեն տուժած վարելահողերը, ստացած բերքը համապատասխան չափաբաժիններով սեփականատերերին կտրամադրվի: Միաժամանակ, փորձ կարվի հողամշակության օրինակելի մոդել կազմակերպել և այն տարածել հանրապետության այլ շրջաններում:

Ա.Հարությունյանը ցավով է նշել, որ շատ հողագործներ մշակությունը կատարում են անորակ, խիստ խնայողության ռեժիմով: Նոր փորձը թույլ կտա հասնել անհամեմատ բարձր բերքատվության, և սեփականատերերը  դրանում պետք է շահագրգռված լինեն` ընդգծել է վարչապետը: Հարկ է, որ նրանք հուսալի գործընկեր դառնան հողամշակության աշխատանքները ստանձնած ընկերություններին, նպաստեն երաշխավորված արդյուքների ստացմանը: Ներկա փուլում հողատերերի  պարտքն է` պայքար տանել ցանքսերում բազմացող մոլախոտերի և դաշտային վնասատուների դեմ: Այդ պարտավորությունից խուսափողների նկատմամբ խիստ քայլեր կձեռնարկվեն` զգուշացրել է կառավարության ղեկավարը:

Նորայր Հովսեփյան

Ստեփանակերտ