Հայաստանի Հանրապետության Նախագահ Սերժ Սարգսյանի և Պաշտոնական այցով Հայաստան ժամանած Լատվիայի Հանրապետության Նախագահ Վալդիս Զատլերսն այսօր Հայաստանի Հանրապետության նախագահ Սերժ Սարգսյանի հետ համատեղ ասուլիսում  հայ ժողովրդին ու երկիր նախագահին իր գոհունակությունն է հայտնել Հայաստան կատարած այցի կապակցությամբ, ապա նկատել է, թե շատ հաճելի է լինել Հայաստան  երկրում, այս հողի վրա:

Բարձր գնահատելով երկու երկրների քաղաքական հարաբերությունների մակարդակը  Վալդիս Զատլերսը նկատել է, որ դրանով հանդերձ լատվիական կողմը մեծ ցանկություն ունի զարգացում տեսնել նաև հայ-լատվիական տնտեսական հարաբերություններում:

«Այդ պատճառով է, որ ինձ ուղեկցում է տնտեսության տարբեր ճյուղեր ներկայացնող ձեռնարկատերերից բաղկացած մեծ պատվիրակություն: Հուսով եմ, որ սա սկիզբ կդնի մեր տնտեսական հարաբերությունների վերընթաց զարգացմանը:

Հայաստանում չափազանց շատ հնարավորություններ կան, եւ հույս ունեմ, որ վաղը կայանալիք գործարար համաժողովը շատ արդյունավետ կլինի: Կարծում եմ` դրան կհաջորդի եւս մեկ համաժողով Ռիգայում»:

Լատվիայի նախագահը ասել է, թե փորձը ցույց է տալիս, որ երկու երկրների   ձեռնարկատերերի կանոնավոր հանդիպումները  եւ միջկառավարական հանձնաժողովի ակտիվ աշխատանքը , որը նույնպես կստեղծվի մեր համագործակցության շրջանակում, երկու երկրների տնտեսական համագործակցության զարգացման կարեւոր նախադրյալներ են:

«Իհարկե, Լատվիան չի կարող իր ծովերը բերել Հայաստան, եւ Հայաստանն էլ չի կարող իր սարերը բերել Լատվիա, բայց Լատվիան որպես ԵՄ անդամ կարող է բավականին նպաստել Հայաստանի ազատ հաղորդակցությանը, մուտքի արտոնագրերի պայմանների դյուրացմանը»:

«Լատվիան մշտապես ակտիվություն է ցուցաբերել, որ  Արեւելյան գործընկերությունն իրականություն դառնա,  եւ հիմա պատրաստ է օգնել հայկական կողմին` Գործընկերության հնարավորությունները լավագույնս օգտագործելու համար: Պատրաստ ենք օգնել մեր անցած ուղու փորձով եւ փորձագիտական հնարավորություններով»:

Նա ասել է, թե Լատվիան այս տարածաշրջանը դիտարկում է որպես մի տարածաշրջան, որը գնալով ավելի սերտ հարաբերություններ է հաստատում ԵՄ-ի հետ: «ԵՄ-ն մեծ շուկա է` մեծ հնարավորություններով: Մենք պատրաստ ենք աջակցելու տարածաշրջանային երկրների միջեւ համագործակցությունը բարելավելու Ձեր  ջանքերին եւ հավատում ենք, որ դա Ձեզ  կհաջողվի»:

ArmAr.am