Ադրբեջանցի հոգեբան Ազադ Իսազադեն կարծում է, որ. «Ադրբեջանական հասարակության ոչ բոլոր անդամներն են պատրաստ միանալու «իրենց հողերի» ազատագրման համար պայքարին»:

Իսազադեն ադրբեջանցի հասարակության մեջ այդ հարցում առկա անտարբերությունը մեկնաբանում է հետևյալ կերպ. «Վետերանների նկատմամբ պետության ուշադրության բացակայությունը բացասաբար է ազդում բնակչության մարտական ոգու բարձրացման վրա»:

Նույն խնդիրն է դիտարկում նաև կոնֆլիկտաբան Արիֆ Յունուսը. նրա կարծիքով, աշխարհաքաղաքական ներկայիս իրավիճակը, որում հայտնվել է Ադրբեջանը, վերջինիս թույլ չի տա պատերազմ սկսել: «Բանն այն է, որ ռազմական գործողություններ սկսելուց հետո ադրբեջանական կողմը կբախվի ոչ միայն Հայաստանի, այլև մեծ տերությունների շահերին»,– ասել է Յունուսը: Նրա կարծիքով, ադրբեջանական կողմը, եթե մե~ծ ցանկություն ունի պատերազմելու, պետք է հույսը դնի ամենաշատը` 5-7 օրվա ռազմական գործողությունների վրա:

Զինվորական լրագրող Ջասուր Սումերինլիի կարծիքով էլ, Ադրբեջանը կարող է հաջողության հույս ունենալ միայն կարճաժամկետ պատերազմում: «Մեր երկիրը երկարաժամկետ ռազմական գործողություններ վարելու ի վիճակի չէ: Միջազգային հանրությունը նույնպես երկարատև ռազմական գործողություններ չի հանդուրժի»:

Ինչպես տեսնում ենք հզոր ու երկարաժամկետ պատերազմի մասին մշտապես հայտարարող Ադրբեջանի նախագահի հոխորտանքները տեղի են տվել,  փոխարենը, հաճախացել են` «Ոչ պատերազմին» թեմայով ադրբեջանցի փորձագետների,  հոգեբանների ու բանակի ներկայացուցիչների ելույթները:   Բնականաբար, վերջիններս նման հայտարություններ  չեն կարող անել առանց Ալիևի գիտության, հետևապես, հստակ է, որ  իրականացնում են վերջինիս հրահանգը` առավել «զուսպ» և «կոռեկտ» խոսել պատերազմի մասին, այդ կերպ փորձելով քիչ թե շատ  մեղմել Ադրբեջանի նախագահի ռազմատենչությունը:

Ահա թե ինչու է Ադրբեջանում սկսել շրջանառվել այն միտքը, թե` «Ադրբեջանի համար խիստ վտանգավոր  կլինի պատերազմի վերսկսումը»: Հետաքրքիրն այն է, որ սրան զուգահեռ սկսել են շրջանառվել նաև «փոքր պատերազմի», ինչպես վերևում ասվեց` 5-7 օրվա պատերազմի,  հնարավոր վարկածը ևս:

Այս ամենը պատահական չեն ու ակնհայտորեն հուշում են պատերազատենչությունից ալիևյալ վարչակազմի նկատելի հետնահանջի մասին: Հասկանալի է, որ Ալիև կրտսերն այլևս համոզվել է, որ իր ռազմատենչ քաղաքականությունը հոգնեցրել է բոլորին` թե’ իր հասարակությանը, թե’ միջազգային կառույցներին:  Հայտնի է թե ինչ հակազդեցություն առաջացրեց նրա` նախաաթենքյան պատերազական կոչը:    Այնպես որ, Ալիևը հրաշալիորեն գիտակցում է, որ իր որդեգրած քաղաքականությունն այլևս հայտնվել է փակուղում: Բայց որպեսզի խիստ ակնառու չլինի հետնահանջը և սեփական հասարակությանը չներարկվեն պարտվողական տրամադրություններ, ալիևյան վարչախումբը սկսել է հասարակության մեջ հակապատերազմական քարոզչություն իրականացնել` փոքր-փոքր ու դանդաղ ներարկումներով:

ArmAr.am

Թեգ

Ալիև, Ադրբեջան, հոգեբան Ազադ Իսազադե, կոնֆլիկտաբան Արիֆ Յունուս, լրագրող Ջասուր Սումերինլի, պատերազմ,