Ինչպես արդեն տեղեկացրել ենք, դեկտեմբերի 17-ին Հայաստան էին ժամանել թուրքական հայտնի լրատվամիջոցների` CNNturk, Hurriyet, Hurriyet daily news, Milliyet, Sabah, Aksam, Referans, Taraf լրատվամիջոցների ներկայացուցիչները:

Հայաստան այցելած թուրքական լրատվամիջոցների ներկայացուցիչները դեկտեմբերի 20-ի առավոտյան Եվրասիա համագործակցության հիմնադրամի կողմից կազմակերպված ծրագրի շրջանակներում այցելել են Էջմիածինի Մայր տաճար եւ ներկա գտնվել կիրակնօրյա պատարագին:

Թուրքիայից ժամանած հյուրերին Էջմիածնում ներկայացվել է հայոց եկեղեցու, Հայաստանում քրիստոնեության տարածման պատմությունը: Հյուրերը հետաքրքվել են նաեւ խաչքարերով, դրանց ստեղծմամբ եւ նշանակությամբ: Թուրքիայից եկած լրագրողները՝ տպավորվելով պատարագից, նշել են, որ եկեղեցու ներսում տիրում էր հանգիստ եւ տպավորիչ մթնոլորտ:

Հիշեցնենք, որ մինչ այդ թուրք լրագրողները  հանդիպել էին ՀՀ արտգործնախարարի եւ քաղաքական այլ գործիչների հետ: