«2009-ի համաշխարհային տնտեսական ճգնաժամից կարելի էր նաև օգուտներ քաղել»,-ArmAr.am էլեկտրոնայի օրաթերթի թղթակցի հետ զրույցում ասաց   տնտեսագետ Թաթուլ Մանասերյանը:

Ըստ տնտեսագետի, Հայաստանը  չօգտվեց ընձեռված հնարավորությունից, մինչդեռ կարելի էր, ձեռնարկությունները վերազինել նոր սարքավորումներով, որը թույլ կտար դառնալ ավելի մրցունակ  և հնարավորություն կտար ավելի պատրաստված դուրս գալ ճգնաժամից:

Բայց սրանով հանդերձ, պրն. Մանասերյանը համոզված է, որ դեռ ամեն ինչ կորած չէ և կարելի է օգտվել հնարավորություններից: Հայաստանը համեմատելով ԱՊՀ երկրների հետ` Թ. Մանասերյանը փաստում է, որ Հայաստանում տնտեսական անկումը վատթարագույնի չհասավ:

Խոսելով 2009-ի ձեռքբերումների մասին նա անդրադարձավ գործադիրի և օրենսդիրի միջև ձևավորված` «նոր որակի» կապերին. «Նախկինում ԱԺ-ի և կառավարության աշխատանքներն առանձնապես համագործակցային բնույթ չէր կրում: Գործադիրի բոլոր օրենսդրական նախաձեռնություններն ԱԺ-ն, միանշանակ, հաստատում էր: Այս տարի հատկանշական էր նրանով, որ այդ համագործակցությունն ավելի առարկայական էր: Օրինակ` հարկային փաթեթի հետ կապված բավական լուրջ քննարկումներ տեղի ունեցան, իսկ արդյունքում մշակվեց  լավագույն տարբերակը:  Ընդունվեց մի փաթեթ, որը մի կողմից ստվերը կրճատելու միտում ունի, մյուս կողմից` չի վնասում գործարարությանը»:

Տնտեսագետը դժվարացավ կանխատեսումներ անել  2010 թվականի համար:  «Ամեն ինչ կախված է այն տերությունների տնտեսական քաղաքականությունից, որտեղից սկիզբ է առել ֆինանսական ճգնաժամը: Կարելի է լավատեսական կանխտեսումներ անել, սակայն չի բացառվում, որ հետագայում էլ տնտեսական ոլորտում հետընթաց արձանագրվի: Պատճառներից մեկն այն է, որ տնտեսական գլոբալացումը երկրներին լուրջ փոխկապվածության մեջ է դրել:

Եթե առանձին երկրների տնտեսական կառավարման մոդելները կատարելագործվել են, իսկ մյուս պետությունները դրան դեռ չեն հասնել, ապա համադրել ուժերը չի հաջողվի, ուստի ճգնաժամը հաղթահարելը դժվար կլինի»: Հետևապես, ըստ Թաթուլ Մանասերյանի,  տնտեսական  ճգնաժամից հնարավոր կլինի դուրս գալ միայն միջազգային համագործակցության ասպարեզում` ջանքերի համադրմամբ:

ArmAr.am