Կայուն ոռոգման համակարգի առկայությունն է, որ կարող երաշխավորել գյուղատնտեսության ոլորտի զարգացումը: Ասկերանի շրջանում այդ ուղղությամբ կատարված աշխատանքներում ակնհայտ են թե ձեռքբերումները, և թե բացթողումները:

Բաց, հողային ջրանցքը որոշ հատվածներում անհարմարություններ էր ստեղծում Իվանյանում եւ Ասկերանում` թե բնակելի եւ թե վարչական շենքերի համար: Որոշ  հատվածներում բաց ջրանցքը փոխարինվել է խողովակաշարով:

Նախագծային պահանջների համաձայն` դրա թողունակությունը պետք է կազմեր վայրկյանում 410 լիտր: Փոխարենը, այսօր այդ ցուցանիշը կազմում է ընդամենը 60 լիտր/վայրկյան: Պատճառը շինարարության ընթացքում տեղ գտած թերություններն են: Կառավարությունը նման վիճակում օբյեկտի ընդունումն անթույլատրելի է համարում: Ասենք, ոլորտի պատասխանատուներն էլ այլընտրանք չեն տեսնում: «Առանց հետաձգելու համապատասխան հանձնաժողով կկազմվի եւ անհրաժեշտ քայլերը կձեռնարկվեն»,- վստահեցնում է ԼՂՀ ԿԱ Ջրային տնտեսության  վարչության պետ Սեյրան Միքայելյանը:

Սովետարխ ջրանցքի «Թունել» կոչվող տեղամասում աշխատանքներն արդեն ավարտվել են: Նախկինում ջրի ամենամեծ կորուստները հատկապես այդ տեղամասում էին գրանցվում: Այսօր այդ հատվածի  թողունակությունը կազմում է 2,5-2,8 մետր խորանարդ` մեկ վայրկյանում,- մանրամասնում է Ջրային տնտեսության  վարչության պետը:

Ասկերանի շրջանում այդ ջրատարի գործարկման հետ մեծ հույսեր են կապում. ի վերջո, դա թույլ կտա ավելի արդյունավետ օգտագործել Կարկառ գետի ջրերը, կարեւորում է Ասկերանի շրջվարչակազմի աշխատակազմի գյուղվարչության պետ Արվիդ Ղուլյանը:

Կատարված աշխատանքների իրական նշանակությունը, սակայն, ավելի մեծ է: Դրանց շնորհիվ հնարավոր կլինի լրացուցիչ ջուր հասցնել նաեւ Խաթունարխ ջրանցքին: Արդյունքում մոտ 2.5 հազար հա հողատարածք կօգտվի ոռոգման համակարգից: Դեռ ավելին. դա թույլ կտա ջուրը ոչ միայն դաշտերին հասցնել, այլեւ ամբարել` ամառային անջուր ամիսներին օգտագործելու համար:

Իսկ Խաթունարխի երկայնքով որոշ հատվածներում արդեն սկսվել էին ոռոգման աշխատանքները: Որ ջուրն իրոք Խաթունարխով Բերդաշենի ջրամբարին է հասնում` կառավարության ղեկավարն անձամբ համոզվելու առիթ ունեցավ:  350 հազար խորանարդ մետր տարողությամբ ջրամբարն արդեն  կիսով չափ լի է: Դա մշակովի հողերի մի զգալի հատված կապահովագրի  ոչ միայն գարնանային, այլեւ ամառային անջուր ամիսներին: «Դա թույլ կտա ապահովագրել 300-350հա հողատարաքներ»,- կարեւորում է Բերդաշենի համայնքի ղեկավարի տեղակալ Յուրիկ Հովսեփյանը:- Այդ տարածքներում ոչ միայն հացահատիկ, այլեւ այլ մշակաբույսեր եւ խաղող է աճեցվում: Ջուրն այսօր հասնում է ցանքսերին. եթե չենք օգտագործում` թերությունը մեզանում պետք է փնտրենք»:

Ն. Հովսեփյան

Ստեփանակերտ

ArmAr.am