Ինչպես տեղեկացրել էինք, հունվարի 10-ին Վրաստան էր այցելել Հանրապետական սենատոր Ջոն Մաքքեյնին, որին  Վրաստանի նախագահ Միխեյիլ Սահակաշվիլին շտապեց «Ազգային հերոսի» կոչում  շնորհել: Ամերիկացի սենատորին գովերգելու համար  Սահակաշվիլին օգտագործեց վրացերեն լեզվի բառապաշարի ողջ ընտրանին, վերջում էլ մի ատրճանակ նվիրեց, որը, Սահակաշվիլու հյուսած հեքիաթի համաձայն`  Վիետնամի պատերազմի տարիներին մի ռուս գեներալ խլել էր ամերիկացի գերի օդաչուից: «Այդպիսի հերոսներ գոյություն ունեն ոչ միայն ֆիլմերում և գրքերում, այլ իրական կյանքում»,- շարունակել է հերոսացնել Մաքքեյնին`  Վրաստանի նախագահը:

Վրաստանի նախագահի  ամերիկահաճո ջանքերը տվեցին իրենց  արդյունքը: Իր հերթին ամերիկացի սենատոր Ջոն Մաքքեյնը ոգևորված հայտարարել է` Վրաստանն ունի հրաշալի նախագահ` ի դեմս Միխայիլ Սահակաշվիլու: Նա նույնիսկ ամերիկացիներին խորհուրդ է տվել. «Եթե ամերիկացիներն իսկապես ցանկանում են այցելել երկիր, որտեղ իրապես սիրում են ԱՄՆ-ն, իմ խորհուրդն է` այցելել Վրաստան», – ասել է սենատորը: Այս մասին փոխանցում է  Fox News-ը:

ArmAr.am