Հետաքրքիր զարգացումներ են տեղի ունենում Լեռնային Ղարաբաղի շուրջ. մի կողմից, Ռուսաստանի գործողությունների  ակտիվացումը` որպես միջնորդ կողմ, մյուս կողմից, ԱՄՆ-ի կատարած քայլը`մասնավորապես, Բրադկեի այցը Լեռնային Ղարաբաղ: Այս առիթով, ArmAr-ին տված հարցազրույցում  իր գնահատականն է ներկայացնում քաղաքագետ Լևոն Շիրինյանը:

«ԱՄՆ-ի և Ռուսաստանի միջև  տրամաբանված և ինչ որ տեղ միջազգային իրավունքին համահունչ քաղաքականություն է իրականացվում: Դա նշանակում է, որ համաշխարհային հանրություն կոչվածը, կարծես, ուզում է հաշվի առնել միջազգային օրենքը և հարգել Արցախի ինքնորոշման իրավունքը. ամերիկացիների ներկայությունը դրա ապացույցն է: Եթե ամերիկացիները գնում են Ղարաբաղ, նշանակում է, որ նրանք ընդունում են Ղարաբաղի` ինքնուրույն սուբյեկտ լինելու  իրավունքը:

Միացյալ Նահանգները Թուրքիայի հետ հարաբերություններում հստակ հայտարարեցին, որ  Թուրքիան իրավունք չունի թափանցել Անդրկովկաս: Այդ է  նշանակում, երբ շեշտում են, որ Ղարաբաղի հարցը չպետք է կապվի հայ-թուրքական հարաբերությունների նորմալացման հետ: Ռուսաստանը ևս հստակ կրկնեց` «ձեռքերդ հեռու Կովկասից», այսինքն, Ղարաբաղի պատրվակով չեն կարող մուտք գործել այս տարածաշրջան: Կարծում եմ, այս ուղղությամբ զարգացումները նորմալ են մեզ համար: Մենք պետք է շատ ավելի խելոք լինենք և պահենք մեր պահանջների որոշակի մակարդակը: Հայաստանի դիվանագիտությունը և քաղաքական կուրսը հիմնականում ճիշտ են և բխում են  ՀՀ  շահերից և հայության շահերից առհասարակ:

Ժամանակն է, որ Հայաստանը Թուրքիայի հանդեպ իր դիրքորոշումը կարծրացնի և քիչ խոսի փոխզիջումների մասին»: