«Ղարաբաղյան հակամարտության ռազմական լուծումը Ադրբեջանին տնտեսական մեծ վնաս կհասցնի, կնվազեն միջազգային ներդրումները», -այս մասին ասել է  ԱՊՀ երկրների ինստիտուտի տնօրեն Կոնստանտին Զատուլինը` «Ամերիկայի ձայն»-ին տված հարցազրույցում:

«Քանի որ հակամարտության կողմերը տարբեր պատկերացումներ ունեն բանակցությունների վերջնական արդյունքների վերաբերյալ, ինքս, բացի ուժային սցենարից, խնդրի կարգավորման այլ հեռանկար դեռ չեմ տեսնում»,- հակամարտության կարգավորման նման ընթացք է կանխատեսել քաղքագետը:

«Սակայն եթե ադրբեջանական ղեկավարությունը, այնուամենայնիվ, փորձ անի վերականգնել վերահսկողությունը կորուսյալ կամ, ինչպես ինքն է համարում, Հայաստանի կողմից «զավթված» տարածքների վրա, ապա նման գործողության հաջողությունն այնքան էլ ակնհայտ չէ: Դա նվազագույնը կհանգեցնի տնտեսական մեծ հիմնախնդիրների եւ միջազգային ներդրումների նվազման»,- ասել է Զատուլինը:

Այս առումով Զատուլինը դրական է գնահատում  բանակցային գործընթացի շարունակականությունը, քանզի այն հույսեր է ներշնչում, որ հնարավոր է գտնել  հիմնահարցի խաղաղ լուծումը:

«Ռուսաստանը, ԱՄՆ-ը եւ Եվրամիությունը Բաքվին ու Երեւանին, պարզապես,  կթելադրեն վերջնական կարգավորման պայմաններ»,- Զատուլինը չի բացառում, որ կարող է գալ և այդ պահը:

Բայց չէ՞ որ հակամարտության կողմերը կարող են հակադրվել ու մերժել առաջադրվող պահանջները, նկատում է փորձագետն ու հավելում, որ Ռուսաստանից, ԱՄՆ-ից ու Եվրամիությունից բացի այս տարածաշրջանում կան  պետություններ, որոնք   իրենց հերթին կարող են համաձայնել, կամ մերժել նման լուծումները: Զատուլինի ակնարկն ուղղված է Իրանին ու Թուրքիային:

ArmAr.am