«Ղարաբաղի վերադարձը բանակցություններ պետք է ողջունել, դա չի կարող ձեւական լինել։ Ավելին, դա կուժեղացնի հայկական դիրքերը։ Սակայն մինչեւ վերջնական լուծում դեռ երկար ճանապարհ կա։ Եվ այդ ընթացքում Ադրբեջանում պետք է հասկանան, որ Ղարաբաղյան հարցը ռազմական ճանապարհով լուծելն անհնար է»,-ասել է  ԱԺ պաշտպանության, անվտանգության եւ ներքին հարցերի մշտական հանձնաժողովի նախագահ Հրայր Կարապետյանը:

« Մենք հասկանում ենք, որ նրանց բնակչությունը մեծ է, որ նրանք շատ գումար ունեն, որ ունեն նավթ, բայց մենք կազմակերպված ենք, կամք ունենք, գիտենք, որ պետք է պաշտպանենք հայրենիքը, այլ ոչ թե զավթենք ուրիշի հողը»,- ասաց Հ. Կարապետյանը։

Խոսելով հայ-թուրքական արձանագրությունների`  ՍԴ որոշման մասին, Հ.Կարապետյանն ասել է.«Այն իրավաբանների մտքի արգասիքը չէ։ Դա քաղաքական փաստաթուղթ է, որը ցույց է տալիս, որ մեր կողմից որոշակի զգոնության լարում կա այս հարցերի վերաբերյալ: Ղարաբաղի հարցում եւս այդ զգոնությունը թույլ չի տա, որ որեւէ սխալ որոշում կայացվի։ Եթե հակառակը լինի, Դաշնակցությունն իր անելիքը շատ լավ գիտի»։

Հ. Կարապետյանը կարեւորել է Հայաստան-ՀԱՊԿ համագործակցությունը` նշելով, որ առաջիկայում վավերացվելու է ագրեսիայի դեպքում ՀԱՊԿ անդամ երկրների ռազմական աջակցության վերաբերյալ համաձայնագիրը, ըստ որի՝ ՀԱՊԿ անդամ երկրներից որեւէ մեկին վտանգ սպառնալու դեպքում մյուս երկրները պարտավոր են ռազմական աջակցություն ցույց տալ ագրեսիայի ենթարկված երկրին:

Անդրադառնալով զորակոչի հետ կապված խնդիրներին` Հ. Կարապետյանը նշեց, որ զորակոչային տարիքի են հասել ցուրտ ու մութ տարիներին ծնված տղաները: Հանձնաժողովի նախագահի տվյալներով, նախորդ տարիների համեմատ զորակոչիկների թիվը 40000-ով քիչ է: Սակայն, պայմանագրային ծառայության ինստիտուտի ներդրմամբ փորձ է արվում այդ բացը լրացնել։

Պայմանագրային ծառայության տարիքը 40-ից բարձրացվել է մինչեւ 50 տարեկան, իսկ պայմանագրային զինծառայողի աշխատավարձը կազմում է նվազագույնը 100 հազար դրամ։

« USAID-ի անցկացրած հարցումների համաձայն` մեր ժողովրդի ամենափոքր տոկոսն է բանակը կոռումպացված համարում: Այս գործում «առաջատար» են հարկային, դատաիրավական եւ ոստիկանության ոլորտները։ Իսկ եթե զորամասերում պաշտպանության նախարարության կողմից հանպատրաստից ստուգումների ժամանակ պարզվի, որ որեւէ զինվոր բացակայում է զորամասից, սա կարող է տվյալ զորամասի հրամանատարի համար ճակատագրական լինել. նրանք կզրկվեն ուսադիրներից»։

ArmAr.am