Արցախի Հանրապետության Նախագահ Բակո Սահակյանի մոտ  տեղի է ունեցել խորհրդակցություն` 2010 թվականին արտադրական ենթակառուցվածքների ոլորտում իրականացվելիք աշխատանքների վերաբերյալ: Հատուկ ուշադրության կենտրոնում էին էներգետիկայի և կապի ոլորտներին առնչվող հարցերը:

Երկրի ղեկավարն ընդգծել է, որ 2011 թվականին օգտագործվող էլեկտրաէներգիայի 80-ից 85 տոկոսը պետք է բավարարվի սեփական ռեսուրսների հաշվին: Ինչ վերաբերում է հեռահաղորդակցության ոլորտին, Նախագահը կարևորել է հնարավորինս կարճ ժամանակահատվածում Արցախի հանրային հեռուստատեսության հաղորդումների հեռարձակումը հանրապետության ամբողջ տարածքում:

ԼՂՀ նախագահի աշխատակազմի տեղեկատվության գլխավոր վարչության տեղեկացմամբ, խորհրդակցությանը մասնակցում էին ԼՂՀ վարչապետ Արա Հարությունյանը, փոխվարչապետ, ֆինանսների նախարար Սպարտակ Թևոսյանը. համապատասխան գերատեսչությունների ղեկավարները, պաշտոնատար այլ անձինք:

ArmAr.am