Եվրամիության հետ բանակցություններում թուրքական պատվիրակության ղեկավար, Թուրքիայի պետնախարար Էգեմեն Բագիշը հայտարարել է, որ Եվրամիությանն անդամակցելու հարցը Թուրքիայի համար մեծ կարևորություն ունի, «բայց ոչ այնքան, որ Թուրքիան դրա դիմաց զոհի Կիպրոսը»:

Սա, փաստորեն, պատասխանն է թուրքական զորքերը Կիպրոսից դուրս բերելու` Եվրամիության պահանջի:

Ըստ նրա, թուրք զինծառայողները կղզում պաշտպանում են խաղաղությունն ու հանգիստը, իսկ Թուրքիան միշտ կողմ է եղել Կիպրոսի հունական հատվածի հետ շարունակվող բանակցություններին:

Պետնախարարի այս հայտարարությունը հիանալի կերպով ցուցադրում է Թուրքիայի երկդիմի քաղաքականության իսկական էությունը, եթե այն համեմատում ես Արցախյան հարցի կարգավորմանը վերաբերող` այս նույն երկրի մյուս պաշտոնյաների արած հայտարարությունների հետ: Այսինքն` Թուրքիան, որ հայ-թուրքական սահմանի բացման առանցքային պայման է համարում հայկական զորքերի դուրսբերումը «գրավյալ» տարածքներից, իսկ հետո նոր` բանակցությունները շարունակելը, Կիպրոսի հարցում տրամագծորեն հակառակ մոտեցում ունի: Թուրքիան, որ զավթել է ուրիշ մի երկրի  զգալի մասը` հակառակ միջազգային բոլոր օրենքների, շատ բնական է համարում իր զորքերի գոյությունը օտար երկրում և դրանք դիտում իբրև խաղաղության աղավնիներ: Այս նույն թուրքը զենքի ուժով բնաջնջումից փրկված Արցախը համարում է ագրեսոր: Այլ կերպ ասած, սա դիվանագիտական ցինիզմի հերթական, թուրքական արտահայտություն է:

ArmAr.am