Ադրբեջանի ԱԳՆ-ն արձագանքել է Մեծ Բրիտանիայում Սերժ Սարգսյանի ունեցած ելույթին
Ադրբեջանի ԱԳՆ-ն արձագանքել է Մեծ Բրիտանիայում «Չաթեմ Հաուզ»-ում ՀՀ նախագահ Սերժ Սարգսյանի ունեցած ելույթին:
«Ադրբեջանը չի կարող թույլ տալ, որ ԼՂ բանակցությունները շարունակվեն հետագա 15-20 տարիներին։ Այսօրվա ստատուս քվոն արդեն աշխարհում որեւէ մեկին չի բավարարում՝ բացի, երեւի, Հայաստանից: Հարցը պետք է լուծվի կոնկրետ ժամանակային շրջանակներում»,- ասված է Ադրբեջանի ԱԳՆ տարածած հայտարարության մեջ:
Ըստ ադրբեջանական լրատվամիջոցների, հայտարարությունում նաեւ ասվում է, թե իրադարձությունները կարող են անկանխատեսելի զարգացում ունենալ, որի պատասխանատվությունը կկրի բանակցային սեղանի շուրջ «ոչ կառուցողական դիրքորոշում ցուցաբերող կողմը՝ Հայաստանը»:
Հիշեցնենք, որ փետրվարի 10-ին Լոնդոնի Միջազգային հարաբերությունների թագավորական ինստիտուտում ունեցած ելույթի ժամանակ Հայաստանի նախագահ Սերժ Սարգսյանը կոչ է արել՝ «ընդգծված տոնայնություն չտալ տարածքային ամբողջականության սկզբունքին, առավել եւս, որ այն ամենեւին էլ չի նշանակում այն, ինչ փորձում են ներկայացնել ադրբեջանցիները»:
Դիտել Ադրբեջան, Լրահոս, Տարածաշրջան, Քաղաքականություն բաժնի բոլոր նյութերը
