ArmAr.am-ը պարբերաբար անդրադառնում է Ջավախքում վրացական իշխանությունների կողմից վարվող քաղաքականությանը, որն ակնհայտորեն հայկական Ջավախքը հայաթափելու նպատակներ է հետապնդում:

Հանուն այդ նպատակի իրականացման, վրացիները  նույնիսկ քայլեր արեցին այս տարածաշրջանում առավել ակտիվացնել թուրքական տարրի ազդեցությունը: Նույն նպատակին ծառայեցվեց նաև հարևան Թուրքիային սահմանամերձ շրջանների հետ հարաբերությունների առավել ջերմացումը: Վերջերս Սամցխե-Ջավախքի նահանգապետ Լաշա Չկադուան ընդունել էր թուրքական հարևան Արդահան շրջանի նահանգապետ Մուսթաֆա Թաքմենին, որի հետ քննարկել են տարբեր ոլորտներում համագործակցության բազմաբնույթ հարցեր:

Սակայն, ինչպես Ջավախքից  տեղեկացնում է մեր աղբյուրը,  այսօր վրաց-թուրքական  նման հանդիպումները  «կենացների մակարդակից այն կողմ չեն անցնում»: Վերջին շրջանում վրաց իշխանությունները, կարծես թե, սկսել են սթափվել ու գիտակցել, որ թուրքական տարրի ակտիվացումը Վրաստանի համար առավել քան վտանգավոր հետևանքներով է հղի:

Ահա թե ինչու, մեր աղբյուրի փոխանցմամբ, վրացիներն այժմ ավելի շատ սկսել են  զգուշանալ  թուրքական բարեկամությունից, քան Ջավախքի հայկական լինելուց: « Ջավախքը հայաթափելու մոլուցքով տարված վրացիները շատ են տուրք տվել թուրքական բարեկամությանը: Բայց  կարծես սթափվե՞լ են ու սկսել են հասկանալ դրա վտանգավոր հետևանքները, ու այսօր արդեն առավել զգուշավոր են դարձել թուրքերի` նաև ադրբեջանցիների նկատմամբ»:

ArmAr.am