Թուրքական լրատվամիջոցները սկսել են տեղեկություններ հրապարակել այն մասին, թե «Եվրատեսիլ» 55-րդ միջազգային երգի մրցույթում այս տարի Հայաստանը ներկայացնող Եվա Ռիվասի երգում կան ձևակերպումներ, որ  ակնարկում են Հայոց ցեղասպանությունը:

Մասնավորապես «Sabah» թերթը, վկայաբերելով Մոլդովան ներկայացնող երգչի երգի բառերը գրած կոմպոզիտոր Յաքուփ Մութլուի դիտարկումները, գրում է, թե, օրինակ, երգի առաջին տունն ինչպիսի ակնարկներ է պարունակում: Այսպես`

«Տարիներ առաջ, երբ ես փոքրիկ երեխա էի,

Մայրս ինձ ասաց, «Պետք է իմանաս, որ մեր աշխարհը անողորմ է ու դաժան:

Սակայն դու քո ճանապարհը կարող ես գտնել

Շոգի և սառնամանիքի միջով անցնելով»:

Յաքուփ Մութլուի դիտարկմամբ` նշված խոսքերն ակնարկում են 1915թ. հայերի արտագաղթը և արտագաղթի ճանապարհին նրանց կրած զրկանքները:

Այս կերպ, ըստ էության, թուրքական մամուլը փորձում է քաղաքական երանգ տալ Եվա Ռիվասի երգին` նպատակադրվելով վարկաբեկել Հայաստանի անունը համաեվրոպական երգի մրցույթի հեղինակավոր բեմում: Անկասկած, դա էժանագին հնարք է` հակադարձելու օրըստօրե իր աշխարհագրությունն ընդլայնող Հայոց ցեղասպանության միջազգային ճանաչման գործընթացին:

ArmAr.am