ArmAr.am էլեկտրոնային օրաթերթի հրացազրույցը, ՀՀԿ  մամուլի խոսնակ, ՀՀ ԱԺ ՀՀԿ խմբակցության քարտուղար, Էդուարդ Շարմազանով

-Ղազախստանի ԱԳ նախարար, ԵԱՀԿ գործող նախագահ Կանատ Սուդաբաևն իր այցի ընթացքում հայտարարեց, թե արցախյան հիմնախնդրի կարգավորման գործընթացում  իր երկիրը`Ղազախստանը կարող է ստանձնել անկողմնակալ միջնորդի դեր:

Ձեր կարծքով, Ղազախստանը, իրո՞ք, կարող է նման դերակատարում ունենալ:

-Արցախյան հիմնախնդրով զբաղվող միջնորդներ արդեն  կան, և դա ԵԱՀԿ Մինսկի խմբի համանախագահներն են՝ Ռուսաստանը, ԱՄՆ-ն և Ֆրանսիան։ Կարծում եմ, որ  Ղազախստանի ԱԳ նախարարը, որպես ԵԱՀԿ գործող նախագահ իր պարտավորությունների ու լիազորությունների շրջանակներում ցանկանում է  անել հնարավորը, որպեսզի խնդրի խաղաղ կարգավորումը լինի բացառապես բանակցությունների և այն սկզբունքների հիման վրա, որ որդեգրել են Մինսկի  խմբի համանախագահները։ Միաժամանակ ուզում եմ հիշեցնել  ԵԱՀԿ 56 նախարարների հայտարարությունը, որում առաջին անգամ ամրագրվել է Արցախի Հանրապետության ինքնորշման իրավունքի մասին: Իսկ այս հայտարարությանը, ինչպես հայտնի է, միացել է նաև  Ադրբեջանը:

– Բայց նաև հայտնի է, որ ԵԱՀԿ գործող նախագահը, այդ թվում և իր երկրի ղեկավարությունը, բազմիցս հայտարարել են, որ  Ադրբեջանի տարածքային ամբողջականության սկզբունքի պաշտպաններն են։

-ԵԱՀԿ նախագահը ցանկացած պարագայում պետք է գործի իր լիազորությունների շրջանակնում։ Ինձ համար շատ ավելի ընդունելի և կարևոր Է ԵԱՀԿ 56 նախարարների հայտարարությունը։ Ինչ վերաբերում է տարածքային ամբողջականությանը, ապա պետք է ասեմ, որ ոչ Շահումյանը, ոչ էլ Արցախը  երբևէ չեն եղել անկախ Ադրբեջանի կազմում։

-Ի՞նչ կարծիքի եք այն մասին, որ Արցախի Հանրապետությունը ներկա փուլում ներգրավվի բանակցությունների գործընթացում։

-Առանց Արցախի Հանրապետության մասնակցության՝ չի կարող լուծվել Արցախի հարցը։ Խնդիրը պետք է լուծվի Արցախի ժողովրդի կամարտահայտությամբ, ինչի մասին նշվել է նաև համանախագահ երկրների նախագահների հայտարարության մեջ։ Իսկ այն, որ ԵԱՀԿ գործող նախագահը Երևանում հանդիպեց Արցախի Հանրապետության նախագահ Բակո Սահակյանի հետ փաստում է այն մասին, որ Ադրբեջանը ուզի, թե՝ չուզի, Արցախի Հանրապեությունը մասնակցում է  բանակցություններին։ ԵԱՀԿ գործող նախագահը Երևանում հանդիպելով Արցախի Հանրապետության նախագահի հետ ցույց տվեց, որ ԵԱՀԿ-ն անուղղակորեն ընդունում է, որ Արցախի Հանրապետությունը բանակցային կողմ է։

ArmAr.am