Աշխարհի տարբեր երկրներում շարունակվում են  կազմակերպվել Ադրբեջանի Սումգայիթ քաղաքում հայերի նկատմամբ իրականացված ոճիրի  զոհերի հիշատակին նվիրված միջոցառումներ:

Փետրվարի 27-ին Գերմանիայի մայրաքաղաք Բեռլինում տեղի են ունեցել Սումգայիթի զոհերի հիշատակի 22-րդ տարելիցին նվիրված միջոցառումներ` կազմակերպված գերմանահայ համայնքային կազմակերպությունների կողմից:

Բեռլինի Սբ. Լուիզեն եկեղեցիում տեղի է ունեցել սգո պատարագ, այնուհետեւ Շարլոտենբուրգի թաղապետարանի դահլիճում կազմակերպվել է Սումգայիթի զոհերի հիշատակի 22-րդ տարելիցին նվիրված հիշատակի երեկո: Միջոցառման ընթացքում ելույթ են ունեցել Գերմանիայում Հայաստանի դեսպան Արմեն Մարտիրոսյանը, Գերմանիայում Լեռնային Ղարաբաղի մշտական ներկայացուցիչ Գայանե Ափինյանը եւ հայտնի հայագետ ու գիտնական Թեսսա Հովմանը: Միջոցառմանը մասնակցել են նաեւ Գերմանիայի հունական եւ իրանական համայնքների ներկայացուցիչներ եւ գերմանացիներ:

Միջոցառմանը ցուցադրվել են փաստավավերագրական տեսանյութեր սումգայիթյան ողբերգության վերաբերյալ:

ArmAr.am