ArmAr.am էլեկտրոնային օրաթերթի հարցերին պատասխանում է ԱԺ պատգամավոր, ՀՀԿ խորհրդի անդամ Արտակ Զաքարյանը:

-Եվ հայկական,  և թուրքական կողմերից հնչում են կարծիքներ, թե հայ-թուրքական բանակցային գործընթացը հայտնվել է փակուղում: Ինչպե՞ս կգնահատեք ներկա իրավիճակը:

-Եթե Թուրքիայի քաղաքական-պետական շրջանակները շարունակեն վարել այն  քաղաքականությունը, որ որդեգրել ու մինչ օրս շարունակում են իրականացնել, ապա չի բացառվում , որ այդ գործընթացը կարող է հայտնվել փակուղում:

Հայաստանն իր ստանձնած պարտավարությունների շրջանակներում  նախատեսվող բոլոր գործողություններն իրականացրել է: ՀՀ նախագահն իր լոնդոնյան հայտնի ելույթում հստակ հայտարարեց, որ արձանագությունները Թուրքիայի խորհրդարնում վավերացվելուց հետո Հայաստանի խորհրդարանն` ի դեմս քաղաքական մեծամասնության, պատրաստակամ է  վավերացնել արձանագրությունները, բայց միայն Թուրքիայի մեջլիսում վավերացվելուց հետո: Ինչո՞ւ է այս հանգամանքը շատ կարևորում Հայաստանը, քանի որ նոր սկսվող գործընկերային հարաբերություններում հայկական կողմը պետք է վստահ լինի Թուրքիայի իշխանությունների քաղաքական կամքի ու պատրաստակամության հարցում:  Իսկ վստահության լավագույն ապացույցը, տվյալ փուլում, դա Թուրքիայի մեջլիսի կողմից գործընթացի սկսումն է ու արձանագությունների վավերացումը:

-ՀՀ խորհրդարանն իր համաձայնությունը տվեց  «ՀՀ միջազգային պայամանագրերի մասին» ՀՀ օրենքում համապատասխան լրացումներ կատարելուն: Այն հնարավորություն կտա անհրաժեշտության դեպքում կիրառելով սույն օրենքը` դադրեցնել կամ կասեցնել այս կամ այն միջազգային պայմանագիրը: Փաստորեն,  Հայաստանը նախապատրաստական քայլեր է կատարում հարկ եղած դեպքում կանխել թուրքական կողմի վտանգավոր խաղերը:

-Անշուշտ, նման օրենքի առկայությունը  ՀՀ-ին հնարավորություն կտա` ելնելով  քաղաքական իրավիճակից, միջազգային իրավունքի սկզբունքներին համահունչ, իրավական ամբողջ հիմնավորումներով հանդերձ, կասեցնել գործընթացը: Սակայն, Հայաստանը շարունակում է գործընթացի շարունակականության հարցում հայտարարել իր  պատրաստակամության մասին: Ուկրաինայի մայրաքաղաք Կիևում մեր երկրի նախագահը ԱՄՆ փոխպետքարտուղար Ֆիլիպ Գորդոնի հետ հանդիպման ժամանակ ևս  հավաստեց Հայաստանի պատրաստակամության մասին` շարունակել հայ-թուրքական հարաբերությունների կարգավորման գործընթացը: Այնպես որ, այս պահին գործընթացի ողջ պատասխանատվությունը  և հարաբերությունների հետագա ճակատագիրը կախված է միայն Թուրքիայից: Եթե Թուրքիան չցանկանա վիժեցնել սկսված գործընթացը, ապա այն անպայման կունենա իր տրամաբանական շարունակությունը: Իսկ եթե մտնի փակուղի, ուրեմն դրա պատասխանատուն միմիայն Թուրքիան է լինելու:

ArmAr.am