Թուրքական լրատվամիջոցները շարունակում են  անհամբերությամբ հետևել ԱՄՆ Կոնգրեսում ընթացող զարգացումներին, միաժամանակ սեփական հասարակությանը հավաստիացնելով, որ թուրքական իշխանությունները հնարավոր բոլոր միջոցներով փորձում են կանխել վաղը` մարտի 4-ին ԱՄՆ Ներկայացուցիչների պալատում քվեարկվելիք Հայոց ցեղասպանության մասին բանաձևի ընդունումը:

Թուրքական «Vatan»-ը տեղեկացնում է, որ թուրք ընդդիմադիր և իշխանամետ պատգամավորներից կազմված թուրքական խորհրդարանական պատվիրակությունները լայնածավալ լոբբիստական գործունեություն են իրականացնում ընդդեմ բանաձևի ընդունման, իսկ ԱՄՆ-ում Թուրքիայի դեսպան Նամըք Թանը այդ նպատակով հանդիպումներ է ունենում ազդեցիկ հրեական կազմակերպությունների հետ:

Բայց այս ամենով հանդերձ, թուրքական լրատվամիջոցների գնահատմամբ, իրավիճակը Թուրքիայի համար` շոկային է: Թուրքական «Զաման»-ն այս առումով մեջբերում է  Սպիտակ տան Ազգային անվտանգության խորհրդի մամուլի քարտուղար Մայք Համմերի խոսքերը. «2009 թվականի իր ապրիլքսանչորսյան ուղերձում Օբաման ընդգծել էր, որ 1915 թվականի իրադարձությունների վերաբերյալ ունեցած իր տեսակետը չի փոխվել: Մենք կողմն ենք իրողության ճշմարիտ և արդարացի ընդունմանը: Շարունակում ենք հավատալ, որ այդ նպատակին տանող ամենալավ ճանապարհը հայ–թուրքական հարաբերությունների կարգավորման ուղղությամբ գործադրված ջանքերի շրջանակներում է լինելու անցյալում տեղի ունեցած իրադարձություններ քննարկումը: Մենք շարունակելու ենք աջակցել այդ ջանքերին»:

Լրատվամիջոցը կատարելով պարզ թվաբանական հաշվարկ  ահազանգում է` ԱՄՆ Ներկայացուցիչների պալատի Արտաքին հարաբերությունների հանձնաժողովում կա 46 պատգամավոր: Նրանցից 26-ը իշխող Դեմոկրատական կուսակցությունից են, 20-ը` Հանրապետականներ են: Դեմոկրատներից 18-ը վճռականորեն «այո» են ասում այդ բանաձևին: Իսկ հանրապետականներից Ցեղասպանության բանաձևի ընդունմանը կողմ է 7 պատգամավոր: Սպասվում է, որ 25 կողմ 21 դեմ քվեարկության արդյունքներով, բանաձևը կանցնի Ներկայացուցիչների պալատի լիագումար նիստ:

Ինչպես արդեն ասել ենք շատ բան կախված է  Պալատի նախագահ Նենսի Փելոսի դիրքորոշումից: Եթե հավատանք, որ ԱՄՆ կենգրեսականները ընտրվելուց հետո հավատարիմ են մնում նախընտրական խոստումներին, ուրեմն, պետք է համոզված ասենք, որ Փելոսին դրական ընթացք է տալու գործընթացին: Հիշեցնենք, որ վերջինիս ընտրվել է Կալիֆորնիայից, որը համարվում է ԱՄՆ հայաշատ նահանգներից մեկը: Եվ վերջապես, վերհիշենք, որ Փելոսին մշտապես աջակցել է Հայոց Ցեղասպանության բանաձևի ընդունմանը:

ArmAr.am