ՀՀ ԱԳ նախարար Էդվարդ Նալբանդյանը հայտարարել է, որ  Թուրքիայի վարչապետ Ռեջեփ Թայիփ Էրդողանի կողմից արված հայտարարությունը՝ հայ անօրինական միգրանտների հնարավոր արտաքսման վերաբերյալ,  անթույլատրելի քայլ էր:

«Նման հայտարարությունները, անխոս, ոչ միայն վնասում են հայ-թուրքական հարաբերությունների կարգավորման գործընթացին, այլ ցույց են տալիս, որ նման հայտարարություններով Թուրքիան պատրաստ չէ առաջ գնալ»:

ԱԳ նախարարը նկատում է, որ Էրդողանի հայտարարությունը լուրջ քննարկումների թեմա է դարձել հենց Թուրքիայում, նույնիսկ թուրքական լրատվամիջոցներն են տարակուսանք արտահայտում , սակայն իրականությունն այն, է որ նման շեշտադրումներով հայտարարություն առաջին անգամ չէ, որ հնչում է թուրք բարձրաստիճան ղեկավարների կողմից. «Ցավոք, նման հայտարարություն առաջին անգամ չէ, որ արվում է, և դրանք բացասական ազդեցություն են ունենում: Նման հայտարարություններով սկսվեցին 1915 թվականին նախորդած իրադարձությունները՝ կապված Հայոց Ցեղասպանության հետ»,-ասաց նախարարը` հիշեցնելով, որ նման հայտարարություններ է արել նաև Ադրբեջանը Սումգայիթի, Բաքվի ու այլ բնակավայրերի ջարդերից առաջ:

Նալբանդյանը հույս հայտնեց, որ Թուրքիայում կգերակայի առավել իրատեսական մոտեցում, և նա ականջալուր կլինի միջազգային հանրությանը և աշխարհի բոլոր երկրներին, որ պետք է առաջ ընթանալ առանց նախապայամանների, առանց սպառնալիքների, առանց պրովակացիաների և կատարի ձեռք բերված պայմանավորվածությունները, չսպառնա Հայաստանին ու այլ երկրներին: «Դա այն ճանապարհը չէ, որ կարող է գործել քաղաքակիրթ աշխարհում»,-ասաց Նալբանդյանը:

Նա հիշեցրեց, որ Հայաստանն է այդ գործընթացի նախաձեռնողը, և չնայած բազմաթիվ դժվարությունների, կողմերն առաջ են շարժվել և հասել են արձանագրությունների ստորագրմանը:

«Հայաստանը պատրաստ է շարունակել այդ գործընթացը և առաջ շարժվել, բայց դա կախված է նաև թուրքական կողմից: Թե որքանով են նրանք պատրաստ առաջ շարժվել, ցույց կտա ժամանակը»,-ասաց նախարարը:

ArmAr.am