Թբիլիսիում մարտի 22-23-ը կայացել է «Հարավկովկասյան երկաթուղիներ» ՓԲԸ գլխավոր տնօրեն Շևքեթ Շայդուլինի և «Վրացական երկաթուղիներ» ընկերության ղեկավար Իրակլի Էզուգբայի հանդիպումը: Հանդիպման շրջանակներում կողմերը քննարկել են մի շարք հարցեր` ուղևորների և բեռանափոխադրումների, տեղեկատվական և հաղորդակցության տեխնոլոգիաների վերաբերյալ: Այս մասին հայտնում են ՀԿԵ ընկերության մամուլի ծառայությունից:

ՀԿԵ ու «Վրացական երկաթուղիներ» ընկերություններ պայմանավորվել են ստեղծել աշխատանքային խումբ, որը պետք է զբաղվի մարքետինգի վերլուծությամբ և Հայաստանի ու Վրաստանի միջև բեռնահոսքերի ավելացման ուղղությամբ որոշակի միջոցառումներ ձեռնարկի:

Խորհրդակցության գլխավոր թեման «Երևան-Բաթումի-Երևան» հաղորդակցային ուղու կազմակերպումն էր` առաջիկա հանգստյան սեզոնի նախաշեմին: Կողմերը եկել են համաձայնության առ այն, որ Երևան-Բաթումի-Երևան գնացքի երկու ուղղություններով տոմսերի 80 տոկոսը վաճառի ՀԿԵ-ն:

Խորհրդակցության շրջանակներում մեծ ուշադրություն է դարձվել Երևան-Թբիլիսի ուղղությունը սպասարկող գնացքի երթևեկի ժամանակի ու ճանապարհի կրճատման հարցին: Ընկերությունների ղեկավարությունները կարևորել են փորձի և տեղեկատվության փոխանակումը` համագործակցության հետագա ամրապնդման և տրանսպորտային ծառայությունների որակի բարձրացման համար հավասար մատչելիություն և մրցակցություն ապահովան համատեքստում:

ArmAr.am