«Հայտարարությունը ոչ այլ ինչ է, քան ԼՂՀ-ի ինքնորոշման իրավունքի ճանաչում»։
Հայաստանյան քաղաքական ուժերը շարունակում են գնահատականներ հնչեցնել ԱՄՆ-ի, ՌԴ-ի և Ֆրանսիայի նախագահների հայտարարության առնչությամբ: ՀՀԿ մամլո խոսնակ, ԱԺ ՀՀԿ խմբակցության քարտուղար Էդուարդ Շարմազանովը այն դրական է գնահատել. «Հայտարարության մեջ հստակ հղում է արվում թե՛ Մադրիդյան սկզբունքներին, և թե՛ անցյալ տարի Աքվիլայում արված հայտարարությանը։ Ի տարբերություն ադրբեջանական կողմի, որը մշտապես ասում է, թե Լեռնային Ղարաբաղի կարգավիճակի խնդիրը չի քննարկվում, և նման հարց չկա՝ մենք տեսանք, որ այս հայտարարության մեջ ևս հնարավորություն է տրվում ԼՂՀ-ին թե՛ միջանկյալ կարգավիճակ տալու համար, և թե՛ հետագայում պարտադիր ուժ ունեցող ԼՂՀ ժողովրդի կամարտահայտության համար, որը ոչ այլ ինչ է, քան ԼՂՀ-ի ինքնորոշման իրավունքի իրացման ճանաչում»։
Երկրորդ կարևորը, ըստ ՀՀԿ մամլո խոսնակի, այն է, որ Լեռնային Ղարաբաղն ու Հայաստանը պետք է ունենան ընդհանուր ցամաքային սահման և անվտանգության երաշխիքներ։ «Այդ երեք կետերի մասին հայկական կողմը մշտապես խոսել է»,-նշել է Շարմազանովը։
«Այստեղ որոշակի հարցեր են առաջանում՝ քայլերի հերթականության հետ կապված։ Այդ հարցում հայկական կողմի դիրքորոշումն անփոփոխ է. մենք ասել ենք, որ մենք խնդրի լուծմանը պետք է գանք ոչ թե հետևանքներից, այլ պատճառներից, իսկ պատճառների համար անհրաժեշտ է, որպեսզի Լեռնային Ղարաբաղն ունենա հստակ կարգավիճակ»։
ArmAr.am
Դիտել TOP, ԼՂ Հանրապետություն, Լրահոս, Քաղաքականություն բաժնի բոլոր նյութերը
