Խոսելով Վարշավայում կայացած Արևելյան գործընկերության ծրագրին նվիրված մեծ խորհրդաժողովի մասին, ՀՀ ԱԺ եվրաինտեգրման հարցերի մշտական հանձնաժողովի նախագահ Նաիրա Զոհրաբյանը ասել է, թե  ադրբեջանական պատվիրակությունը համաժողովը հերթական անգամ օգտագործեց իբրև հարթակ` խեղաթյուրելու իրականությունը:

Ն.Զոհրաբյանը նկատել է, թե  արձանագրվել է նաև հայ-ադրբեջանական միջադեպ` նույն Մոլազադեի մասնակցությամբ. «Վերջինս կոնֆերանսի ողջ ընթացքում փորձեց խեղաթյուրել, նույն երգը երգելով` 20 տոկոս «գրավյալ» տարածքների, 1 մլն փախստականների և այլնի մասին»: Պատգամավոր Զոհրաբյանը թույլ չի տվել, որ  Մոլազադեն շարունակի իր հեքիաթները.«Ինչպես ասված է հայտնի ասացվածքում` արջը յոթ երգ գիտի, յոթն էլ մեղրի մասին: Ադրբեջանցիները ցանկացած համաժողով, հավաք ու միջազգային հարթակ փորձում են օգտագործել այդ երգը երգելու համար, ինչն անթույլատրելի է և ես չեմ պատրաստվում լռել»:

Համաժողովից հետո հրավիրված մամուլի ասուլիսում ադրբեջանցին դիմել է Ն. Զոհրաբյանին, թե` ի՞նչ կասի նա 20 տոկոս «գրավյալ» տարածքների մասին և «Հայաստանի կողմից Ադրբեջանի տարածքների օկուպացիայի մասին». «Ինձ հայտնի է միայն մեկ օկուպացիա, այն է` Ադրբեջանի կողմից ԼՂՀ Շահումյանի, Մարտակերտի և Մարտունու օկուպացիան, որի մասին էլ հնչեցրի ասուլիսում»,- տեղեկացրել է Ն. Զոհրաբյանը:

Նաիրա Զոհրաբյանի տեղեկացմամբ, Մոլազադեն նույնիսկ ծիծաղելի վիճակում է հայտնվել, ասելով, թե Ադրբեջանը միշտ առաջարկում է խաղաղություն, և իրենք են խաղաղ բանակցությունների կողմնակից, բայց Հայաստանն այն մերժում է:  Ն. Զոհրաբյանը   խորհուրդ է տվել բոլոր ներկաներին ընթերցել Իլհամ Ալիևի վերջին 6 էջանոց ելույթը, որում Ադրբեջանի նախագահը 18 անգամ շեշտում է, թե իրենք` «Ադրբեջանը կնվաճեն պատերազմի միջոցով». «Գուցե ավելորդ էր միջազգային հանրությանը հուշել, որ այդ ելույթն ադրբեջանցիների խաղաղության յուրովի մեկնաբանությունն է, և թե ինչպե՞ս է Ադրբեջանը պատկերացնում խաղաղություն ասվածը»,- ավելացրել է պատգամավորը: