Թուրքիայի զինված ուժերի գլխավոր շտաբը պատրաստել է 1915թ. պատմական անցքերին նվիրված` «Սարը Գելին – Հայկական հարցի էությունը» վերնագրով վավերագրական ֆիլմ, որը ամբողջությամբ հիմնված է խեղաթյուրված «փաստերի» վրա: Պատմական ճշմարտության հետ որևէ առնչություն չունեցող ֆիլմը DVD սկավառակների միջոցով տարածվում է երկրում ու, հիմնականում,  ցուցադրվում  դպրոցներում, բուհերում:

Ֆիլմի ցուցադրումը կրթօջախներում դադարեցնելու նպատակով Հրանտ Դինքի անվան միջազգային հիմնադրամը հայց է ներկայացրել Ստամբուլի 9-րդ վարչական դատարան: Հիմնադրամի համոզմամբ` այդ ֆիլմը կարող է բացասաբար անդրադառնալ աշակերտների հոգեբանության վրա:

Սակայն, ինչպես և սպասվում էր, թուրքական դատարանը հայցը չի բավարարել: Ըստ «Էրմենիհաբեր» (Ermenihaber) լրատվական գործակալության` դատարանի մերժման վճռում ասված է. «Հրապարակված մի շարք պատճառներից ելնելով` դատարանը միաձայն որոշում ընդունեց առանց հետազոտելու մերժել ներկայացված հայցը»:

Դինքի հիմնադրամը պատրաստվում է բողոքարկել դատարանի վճիռը:

ArmAr.am