Պետք է ճանաչվի Արցախի Հանրապետության անկախությունը
ԼՂ անկախության ճանաչումն անիմաստ չի՞ դարձնի ԼՂ խնդրով ընթացող բանակցային գործընթացը հարցին` «Եվրոպական ինտեգրացիա» ՀԿ-ի ղեկավար Կարեն Բեքարյանն այսօր ասել է. «Արցախի Հանրապետության անկախության ճանաչված լինելու հանգամանքը ընթացող բանակցությունների ժամանակ ամրություն է հաղորդելու հայկական կողմերին: Դուք ձեզ պատկերացրեք բանակցողի վիճակում, այն դեպքում, երբ, ասենք, արդեն 8 երկիր ճանաչել է ԼՂ անկախությունը: Դրանից բանակցողի դիրքերն ավելի ամուր կլինեն, իսկ բանակցողի՝ իր շահերին հետամուտ լինելու զինանոցն ավելի հզոր կլինի»,-նկատեց փորձագետը:
Նա նաեւ նշել է, որ չնայած ԵԱՀԿ Մինսկի խմբի հովանու ներքո ընթացող բանակցություններին, Ադրբեջանն այս ընթացքում փորձել է տարբեր միջազգային ատյաններում, օրինակ` ՄԱԿ-ում, համապատասխան փաստաթղթեր ու բանաձեւեր ընդունել տալ: «Դա արվել է հետեւյալ նպատակով՝ փորձել հարակից, լրացուցիչ գործիքների ու գործոնների հաշվին ներազդեցություն մտցնել բանակցային գործընթաց»,-նշեց Բեքարյանը: Նա նաեւ հավելել է` պետք է թե՛ ԼՂՀ-ի, թե՛ նաեւ Հայաստանի կողմից հնարավոր բոլոր ուղղություններով ու խողովակներով ջանքեր գործադրվեն՝ Արցախի Հանրապետության անկախության ճանաչման ուղղությամբ:
Դիտել WestArmenia, ԼՂ Հանրապետություն, Լրահոս, Քաղաքականություն բաժնի բոլոր նյութերը
