Կոնգրեսական Շերման. « Թուրքիան պետք է ճանաչի հայ ժողովրդի դեմ իրականացրած Ցեղասպանությունը»
ԱՄՆ Կոնգրեսի Ներկայացուցիչների պալատի Արտաքին հարաբերությունների հանձնաժողովում երեկ տեղի է ունեցել թուրքական արտաքին քաղաքականությանը նվիրված «Թուրքիայի նոր արտաքին քաղաքական ուղեգիծը և դրա ազդեցությունը թուրք-ամերիկյան հարաբերությունների վրա» խորագրով քննարկում:
Ինչպես տեղեկացնում է Ամերիկայի հայկական համագումարը` քննարկման մասնակիցներն ի թիվս այլ հարցերի անդրադարձել են նաև Հայոց ցեղասպանությանն ու հայ-թուրքական հարաբերությունների կարգավորման գործընթացին:
Ներկայացուցիչների պալատի Արտաքին հարաբերությունների հանձնաժողովի նախագահ Բրեդ Շերմանը, ընդգծելով, որ Թուրքիան պետք է հաշվի նստի իր անցյալի հետ և ճանաչի Հայոց ցեղասպանությունը, հայտարարել է. «Կարևոր է, որ Թուրքիան ճանաչի Օսմանյան կայսրության ժամանակաշրջանում` Առաջին աշխարհամարտի տարիներին, հայ ժողովրդի դեմ իրականացրած Ցեղասպանությունը: Վստահ եմ` թուրքերն իրենց անցյալի հետ հաշվի նստելուց հետո կհասկանան, որ իրենց և իրենց երեխաներին ազատել են հսկայական բարոյական բեռից»:
Կոնգրեսական Ջիմ Կոստան նույնպես, անդրադառնալով Հայոց ցեղասպանությանը, մատնանշել է, որ տեղի ունեցածը հաստատող հսկայածավալ քանակությամբ փաստեր գոյություն ունեն:
Գերմանական «Մարշալ» հիմնադրամի փորձագետ Յան Լեսերը հայտարարել է, որ Հայաստան-Թուրքիա մերձեցման գործընթացն ինքնին կարևոր է և չպետք է այն շաղկապել այլ խնդիրներ հետ, ինչպիսին է, օրինակ, արցախյան հիմնախնդիրը:
ArmAr.am
Դիտել NKR, Լրահոս, Ցեղասպանություն բաժնի բոլոր նյութերը
