Ինչպես հայտնի է, Լոս Անջելեսում բնակվող ամերիկահպատակ Կարպիս Դավոյանն ու Հրայր Թուրաբյանը հայց են ներկայացրել թուրքական կառավարության դեմ`  պահանջելով միլիարդների հասնող փոխհատուցում Թուրքիայից 1915-ին հայերից առգրավված շարժական եւ անշարժ գույքի, ինչպես նաեւ բանկային ավանդների դիմաց:

Լրագրողների հետ հանդիպման ժամանակ թուրքագետ Արտակ Շաքարյանն այսօր հայտարարել է, թե` Թուրքիան բավական վախեցած է իր դեմ ներկայացված հայցից:

«Թուրք վերլուծաբաններն այժմ  փորձում են հուսադրել թուրք հասարակությանը, որ հայցը ընդամենը քաղաքական ուղղվածություն ունի,  զուրկ է իրավական  հիմքից եւ  ԱՄՆ-ը չի կարող Թուրքիային դատի տալ»:

Թուրքագետի խոսքով. «Թուրքերը պատրաստված չէին սրան,  թուրքերը նոր են սկսում ուսումնասիրել այս հայցը:  Նրանց արձագանքներից պարզ է դառնում, որ նրանք չէին պատկերացնում, որ հայերը կարող են հատուցումն այդ մեթոդով պահանջել ու հատկապես  Թուրքիայի պետությանն ուղղված հայցով»:

Նա նաեւ հավելել է, թե հայերս սովորաբար կարծում ենք, որ թուրքերը շատ խելոք են, որ թուրքական դիվանագիոտթյունն ամեն ինչ նախապես հաշվարկում է, մինչդեռ նշված հայցը վկայում է այն մասին, որ իրականությունը բոլորովին այլ է:

Ըստ թուրքագետի , ընդդեմ թուրքական կառավարության ցեղասպանության զոհերի ժառանգների ներկայացրած հայցի ճակատագիրը կախված է ԱՄՆ վարչակազմից և, մասնավորապես` ԱՄՆ նախագահ Բարաք Օբամայից. «Ամեն ինչ կախված է ԱՄՆ ադմինիստրացիայից և անձամբ Օբամայից: Իսկ եթե հանկարծ Թուրքիան այդ հայցի հետ կապված դիմի ԱՄՆ-ին, ապա վերջինս կարող է հղում կատարել 2009-ի ԱՄՆ 9-րդ դաշնային վերաքննիչ դատարանի որոշմանը», -նկատեց թուրքագետը:

Անդրադառնալով կիպրացի հույների համարժեք հայցին դարձյալ ընդդեմ թուրքական կառավարության, թուրքագետ Շաքարյանը կարծիք հայտնեց, որ այդ հայցը միջազգային իրավունքին համապատասխան է: Նա, վկայակոչելով եվրոպական իրավունքի տերմինաբանությանը, նշեց, որ այնտեղ գոյություն ունի «օգտագործման իրավունքի կորուստ» տերմինը, որը նշանակում է, որ մեկ այլ երկրի տարածքը ապօրինի զավթած պետությունը պետք է վճարի այդ տարածքի տնօրինման համար։ «Թուրքիայի դեմ հույների ներկայացրած հայցը հենց այս իրավունքի համաձայն է», -բացատրեց թուրքագետը:

ArmAr.am